QR Premer-Mınıstri Álıhan Smaıylov Sot ákimshiliginiń basshysy Naıl Ahmetzakırovpen kezdesý ótkizdi, onyń barysynda sot júıesin reformalaý jónindegi zańnamalyq túzetýlerdiń ekinshi blogy talqylandy.
Buǵan deıin Joǵarǵy Sot tóraǵasy Aslambek Merǵalıev Memleket basshysyna usynylyp otyrǵan jańashyldyqtar týraly habardar etken bolatyn.
Túzetýlerdi Senat alańynda arnaıy qurylǵan jumys toby ázirledi. Ózgerister «Qazaqstan Respýblıkasynyń sot júıesi men sýdıalarynyń mártebesi týraly» Konstıtýsıalyq zańǵa, prosestik kodeksterge, sondaı-aq birqatar arnaıy zańdarǵa engiziledi.
Joǵarǵy Sot tóraǵasy usynǵan negizgi jańashyldyqtardyń biri – qylmystyq jáne azamattyq ister boıynsha kasasıalyq ótinishhattardy aldyn ala qaraýdy alyp tastaý.
Bul rette el Prezıdentiniń tapsyrmasy boıynsha qazir derbes kasasıalyq ınstansıalar qurý máselesi pysyqtalyp jatqanyn aıta ketý kerek.
Zań jobasy sondaı-aq Sot alqasynyń jáne Sot tóreligi sapasy jónindegi komısıanyń jumysyn jetildirýge, sýdıalardyń táýelsizdigin kúsheıtýge baǵyttalǵan.
Memleket basshysynyń tapsyrmalaryn iske asyrý aıasynda apelásıalyq nemese kasasıalyq satydaǵy sot aktisinde kórsetilgen óreskel buzýshylyqtardyń barlyq faktisi avtomatty túrde Sot alqasyna beriletin jańa mehanızm engizilýde.
Sondaı-aq baǵalaý kórsetkishteriniń sany ońtaılanady, otstavkadaǵy sýdıalar úshin áleýmettik paket jaqsarady, memlekettik qyzmetker bolyp tabylmaıtyn zańgerler úshin Sot tóreligi akademıasynda oqý qoljetimdi bolmaq.
N. Ahmetzakırov zań jobalaryn iske asyrý búdjetten qosymsha qarajat bólýdi talap etpeıtinin atap ótti. Shyǵyndar el Prezıdentiniń tapsyrmasy boıynsha engizilgen sot júıesin (barlyq memlekettik organdar shyǵyndarynyń jalpy somasynan keminde 6,5%-y) qarjylandyrýdyń jańa modeli aıasynda júzege asyrylady.
QR Konstıtýsıasynyń 61-babyna sáıkes engizilgen túzetýler boıynsha qabyldanǵan Úkimettiń oń qorytyndysy Májiliste zań jobalaryna odan ári bastamashylyq jasaý úshin Parlament depýtattaryna joldanady.