Islam dinindegi bes paryzdyń biri – qajylyqqa barý. Bul – materıaldyq múmkindigi bar musylmanǵa paryz amal. Bıyl elimiz boıynsha 4000 adam qajylyqqa barady. Bul týraly QMDB Qajylyq bólimi aıtty, dep habarlaıdy Almaty-akshamy.kz BAQ.KZ-ke silteme jasap.
Osy jyly 9-12 qańtarda Qazaqstan musylmandary dinı basqarmasynyń tóraǵasy Naýryzbaı qajy Taǵanuly bastaǵan delegasıa Saýd Arabıa Koróldiginiń (SAK) Qajylyq jáne umra mınıstri Taýfık ıbn Faýzan ar-Rabıa myrzamen kezdesip, qajylyqqa baılanysty máselelerdi Qazaqstan azamattarynyń múddesi úshin talqylap, qajylyqty uıymdastyrýǵa baılanysty eki jaqty kelisimshartqa qol qoıdy. Bıyl 4 myń otandasymyzdyń qajylyq jasaýyna ruqsat alyndy.
Ár jyl saıyn osyndaı kelisimshart aıasynda QMDB qadaǵalaýymen jáne konkýrstyq negizde qajylyq oryndaryn alǵan otandyq týroperatorlardyń uıymdastyrýymen qazaqstandyq ár qajynyń densaýlyǵy men sapardaǵy qaýipsizdigine basa nazar aýdarylyp, tıisti túsindirme jumystary jáne ýaǵyz-nasıhat júrgizilip, qajylyq amaldary oryndalady, - dep jazdy QMDB.
Mysaly, 2022 jyly konkýrstyq negizde 4000 qajylyq oryndaryn 14 tájirıbeli qazaqstandyq týrfırmalar alyp, qajylyq saparyn uıymdastyrǵan.
Olar: Hıkmet Trevel, Atlas Týrızm, Qyzmet Saıahat, Tawaf Travel, Qazaq Travel, Hıdaıat-Nýr, Nur-Qazaqstan, Nurkhan travel, Sembekova ı K, Sanabl, Mina travel, Al-Marýa, Ordabasy-NJ, Robinzon.
Qazaqstan musylmandary dinı basqarmasynyń qajylyqty uıymdastyrýǵa qatysýy QMDB Jarǵysynyń 2.2 tarmaǵynda jáne dinı týrızm salasyndaǵy týroperatorlyq qyzmet týraly talap erejelerimen (QR Din isteri jáne azamattyq qoǵam mınıstriniń 2017 jylǵy 22 qarashadaǵy №166 buıryǵy) rettelgen.
Alaıda, qajylyq maýsymynan bólek aılarda jyl boıy 20-25 myńǵa jýyq qazaqstandyq azamattar tarapynan umra amaldary oryndalady, - delingen aqparatta.
Búgingi tańda umrany ár týroperator nemese týragent QMDB qatysýynsyz óz qalaýy boıynsha uıymdastyra alady. Sebebi Saýd Arabıasy álemniń elýden asa eline bir jyldyq týrısik vıza rásimdeýge ruqsat bergen. Vıza bir jylǵa beriledi. Atalǵan elge birneshe ret kirip-shyǵýǵa múmkindik bar. Barǵan kezde úsh aıǵa deıin qalýǵa bolady.
Osy oraıda Syrtqy ister mınıstrligi eki el arasyndaǵy tyǵyz qarym-qatynasty nyǵaıtý jolynda orasan zor sharýalar atqarǵandyǵyn eskergen jón. Atalmysh týrısik vızamen Mekke men Mádına qalalaryna kirý, umra jasaý múmkindigi jáne SAK-niń barlyq ólkelerine saıahat jasaý qarastyrylǵan.
Vıza ashylǵan sátten bastap umraǵa aparýshy qazaqstandyq týrfırmalardyń sany artyp keledi. Saýd Arabıasyna umraǵa jol tartqan azamattarǵa sapaly qyzmet kórsetý jáne jolda jeke basynyń qaýipsizdigin qamtamasyz etý atalmysh týrfırmalardyń jaýapkershiliginde.
Degenmen, búginde «Kaýsar Trevel» týrfırmasynyń (atalǵan konkýrstyq negizde qajylyq saparyn uıymdastyrǵan týrfırmalardyń arasynda joq) kúmándi is-áreketterine qatysty birqatar azamattar Dinı basqarmaǵa kelip, shaǵymdanýda.
Joǵarydaǵy aıtylǵan negizdemelerge súıene otyryp, QMDB-ǵa qatysy joq jeke týrfırmalar arqyly umraǵa barýshylardy baqylaýǵa alýǵa jáne olarǵa týrfırmalar tarapynan jasalatyn qyzmetti qadaǵalaýǵa Dinı basqarmanyń zańdy quzireti joq ekenin málimdeımiz, - dedi QMDB Qajylyq bólimi.