Bógenbaı batyrdyń dýlyǵasy elordadaǵy áskerı-tarıhı murajaı tórinen oryn tepti
Buǵan deıin jádiger dańqty batyrdyń jetinshi urpaǵy Jabaı Kenjalınniń qolynda saqtalyp kelgen. Endi ol saltanatty túrde murajaı qoryna tapsyryldy. Mamandardyń aıtýynsha, erlik pen eljandylyqtyń kózi bolǵan kóne jádiger erekshe tarıhı qundylyqqa ıe, dep habarlaıdy Almaty-akshamy.kz
Qazaqtyń uly qolbasshysy úsh júzdiń áskerin basqaryp, halqymyzdyń egemendigi úshin kúreskeni barshaǵa aıan. Sondyqtan is-sharanyń el Táýelsizdiginiń 30 jyldyq mereıtoıyna arnalyp otyrǵany kezdeısoq emes.
Aıta keteıik, batyr qaıtys bolǵannan keıin jeke qarý-jaraǵynyń keıbir zattary úsh ǵasyr boıy onyń otbasynda qasıetti jádiger retinde saqtalyp, urpaqtan-urpaqqa mıras bolyp kelgen. Endi belgili tulǵanyń bas kıimin árbir qazaqstandyq kóre alady.
«Bul búkil Qazaqstan halqy, ásirese, jas urpaq úshin óte mańyzdy. Onyń Otan úshin jasaǵan barlyq erligi - óskeleń urpaqqa úlgi. Biz ata-babalarymyzdyń, batyrlarymyzdyń eńbegin árqashan este saqtaýymyz kerek. Osylaısha búgin Táýelsizdigimizdiń 30 jyldyǵyn toılap jatqan biz 3000 jylǵa umtylýymyz kerek. «Máńgilik el» – óte jaqsy ıdeıa. Osy maqsatta bárimiz eńbek etýimiz kerek», - deıdi «Qarýly kúshterdiń ardagerleri» respýblıkalyq qoǵamdyq birlestigi tóraǵasynyń orynbasary Marat Naǵymanov.