Qazaqstannyń Ulybrıtanıadaǵy elshisi Erlan Ydyrysov - «Erkin adam» ataǵyna ıe bolǵan alǵashqy otandasymyz.
Freeman, ıaǵnı «Erkin adam» ataǵy Birikken Koróldik pen basqa elder arasyndaǵy iskerlik qatynastardy jaqsartýǵa úles qosqan brıtanıalyqtar men sheteldikterge beriledi. Kezinde mundaı qoshemetke patshalar men Premer-Mınıstrler jáne basqa da aty ańyzǵa aınalǵan tulǵalar ıe bolǵan, dep habarlaıdy Almaty-akshamy.kz Khabar.kz-ke silteme jasap.
Londondyq Sıtıdiń qurmetti azamaty – «Frımen» ataǵyn saltanatty túrde tabystaý rásimi 1232 jyldan beri Chemberlen saraıynda ótkizilip keledi. Dál osy jerde Patshaıym Elızaveta Ekinshi, Premer-Mınıstrler Ýınston Cherchıl, Margaret Techer jáne basqa da kórnekti tulǵalar tarıhı qujatqa ıe bolǵan.
Orta ǵasyrlarda bul ataqtyń ıesi London kópiriniń ústimen qoılaryn erkin ótkizý quqyǵyna ıemdengen. Baj salyǵynan bosatylǵan Frımen Smıtfıld bazaryna baryp, malyn saýdalaı alǵan.
Qazir álbette bul ataqtyń tek sımvolıkalyq qundylyǵy bar. Biraq Birikken Koróldik pen basqa elder arasyndaǵy iskerlik qatynastardy nyǵaıtýǵa zor úles qosqan brıtanıalyqtar men sheteldikterge ǵana beriledi. Qazaqstannyń Ulybrıtanıadaǵy elshisi Erlan Ydyrysov – osyndaı qurmetke ıe bolǵan alǵashqy otandasymyz. Oǵan «Bostandyq kóshirmesi» atty pergament qujaty tabystaldy. Marapattyń avtory – XVIII ǵasyrdyń ortasynda Londondyq Sıtıdiń lord-meri bolǵan Djon Barnard. İshinde «Erkin adam - Frımenniń» ómir súrý saltyn sýretteıtin nusqaýlyq bar.
«Qurmetti azamat ataǵy – Londondyq Sıtıdiń eń joǵarǵy marapaty. Saltanatty rásimniń Qazaqstan men Ulybrıtanıa arasyndaǵy dıplomatıalyq qarym-qatynastyń 30 jyldyǵy qarsańynda ótip jatqanyn atap ótken jón. Osy ýaqyt aralyǵynda eki el túrli salalar boıynsha myqty strategıalyq áriptestik ornata bildi», - deıdi Brıtan-qazaq qoǵamynyń operasıalyq dırektory Djeffrı Templ.
Bul ataq – Birikken Koróldiktiń Qazaqstanmen áriptestigin tereńdetýge múddeli ekendiginiń aıǵaǵy. Sonymen qatar memleketimizdiń álemdik qarjy ortalyǵy – Londondyq Sıtımen áriptestik baılanysy nyǵaıa túskendiginiń dáleli. Qazaqstan áli de brıtanıalyq ınvestorlar men bızneske qolaıly jaǵdaı jasap, otandyq kompanıalarymyzdyń Sıtıdegi jumys aýqymyn keńeıtýge yqpal ete bermek.