JOO bitirgen túlekter qosymsha testileýden ótýi tıis.
Qazaqstannyń Bilim jáne ǵylym mınıstri Asqat Aımaǵambetov ustaz mamandyǵyn tańdaǵan jas túlekterge qoıylǵan talaptar týraly aıtty, dep habarlaıdy Almaty-akshamy.kz.
«Osyǵan deıin muǵalimderdi konkýrs arqyly jumysqa qabyldaýdyń jańa júıesi jaıynda post jarıalaǵanmyn. Ondaǵy talaptardyń biri - pedagog qyzmetine alǵash kiriskeli turǵan mamandarǵa mindetti biliktilik testileýden ótý. Osy jazbamda sol talaptar týraly tolyǵyraq toqtalamyn», - dep jazdy mınıstr Facebook paraqshasynda.
Mınıstrdiń aıtýynsha, 2021 jyly alǵash ret pedagogıkalyq baǵytta bilim alǵan 32 myń túlek testileýden ótken.
«Testileý pılotty túrde ótti. Biraq endi jańa erejelerdi qabyldaǵannan keıin, bıyldan bastap túlekterge mektepke jumysqa ornalasý úshin pedagogıkalyq joǵary bilimi týraly dıplomynyń bolýy jetkiliksiz. Endi qosymsha testileýden ótý arqyly «Pedagog» biliktiligin alýǵa mindetti. Bul qalaı júzege asyrylady? Bári óte qarapaıym», - deıdi Asqat Aımaǵambetov.
Mınıstrdiń sózine júginsek, tórt jyl boıy matematıka muǵalimi mamandyǵyn oqyǵan stýdent mektepke jumysqa ornalasýy úshin Ulttyq biliktilik testin tapsyratyn bolady. Testileý suraqtarynda matematıka boıynsha mektep baǵdarlamasy men sol pán boıynsha sabaq berý ádistemesi qamtylady. Joǵary oqý ornynda shyn máninde tórt kýrs oqyp, qajetti bilim alǵan stýdentterge test tapsyrý qıyndyq týdyrmaıdy.
«Al birqatar sebeptermen bilimi men qabileti balalarymyzdy oqytýǵa jetkiliksiz túlekter bilim berý uıymdaryna qabyldanbaıdy. Bizge san emes, sapa mańyzdy. Tıisti deńgeıde bilimi joq túlekter balalarmen jumys istemeýi kerek», - deıdi Asqat Aımaǵambetov.
Sonymen qatar mınıstr 2021 jylǵy pılottyq jobanyń nátıjeleri týraly jazdy.
«Bolashaq pedagogterdi alǵash ret testileý kóptegen joǵary oqý oryndary úshin úlken synaq boldy. Bastapqyda belgilengen shekti deńgeıdi aıtarlyqtaı tómendetkenimizge qaramastan, túlekterdiń 46 paıyzy ǵana qajetti bal jınaı alǵanyn aıta ketken jón. Bul - test tapsyrǵan 32 myń túlektiń 15 myńy ǵana. Aqparat retinde aıta keteıin, jyl saıyn bilim berý uıymdaryna 12-14 myńǵa jýyq pedagog jumysqa ornalasady. Iaǵnı, bul shara muǵalim tapshylyǵyna aıtarlyqtaı áser etpeıdi. Bárinen buryn mundaı nátıje joǵary oqý oryndaryn lısenzıasynan aıyrý, profıldeý, bilim berý baǵdarlamalaryn jańartý jáne basqa da bastamalar boıynsha mınıstrliktiń qabyldap jatqan sharalarynyń qajet ári durys ekenin aıqyn kórsetip otyr», - dep jazdy mınıstr.
Asqat Aımaǵambetov buǵan deıin pedagogterdi elimizdiń 86 joǵary oqý orny daıarlaǵanyn atty. Mınıstrlik atqarǵan jumystyń nátıjesinde 30-dan astam JOO-nyń pedagogıka boıynsha lısenzıasy qaıtaryp alynǵan.
«Biraq, sonyń ózinde áli 50-den astam joǵary oqý ornynyń lısenzıasy bar, olar pedagogterdi daıarlaýdy jalǵastyryp jatyr. Barlyq másele olardyń keıbiriniń nátıjeleri oqytý sapasyna qoıylatyn talaptarǵa sáıkes kelmeıtindiginde. Osyǵan baılanysty aldaǵy ýaqytta da elimizde kadrlar daıarlaý sapasyn jaqsartý úshin qajetti sharalardy qabyldaıtyn bolamyz, ásirese, pedagogıkalyq baǵytta. Endi negizgi trend anyqtalyp, pedagog mamandyǵy mektep túlekteri úshin qyzyqty bola bastaǵan kezde, bizge bolashaq muǵalimderdi joǵary sapada daıarlaýdy qamtamasyz etý óte mańyzdy», - dep jazdy mınıstr.