Áleýmettik saýalnama nátıjesi belgili boldy.
Bıyl 9-28 maýsym aralyǵynda Qalaisyn.kz platformasynda onlaın-saýalnama ádisimen Prezıdent Qasym-Jomart Toqaevqa, sondaı-aq memlekettik organdarǵa senimge qatysty áleýmettik zertteý júrgizildi, dep habarlaıdy Almaty-akshamy.kz Baq.kz silteme jasap.
Zertteý jańadan qurylǵan oblystardy qosa alǵanda, Qazaqstannyń barlyq aýmaǵy boıynsha 18 jáne odan asqan jastaǵy 6 myń respondent arasynda ótkizildi. Saýalnama nátıjeleri reprezentatıvti jáne Qazaqstannyń barlyq halqyna qatysty boljamdalady.
Saýalnama derekteri kórsetkendeı, Memleket basshysy zor senimge ıe - oǵan qazaqstandyqtardyń 83,63%-y senedi. Sosıologıalyq monıtorıń qorytyndysy suralǵandardyń 78,81%-y Memleket basshysy jumysynyń qazirgi nátıjelerine qanaǵattanǵanyn kórsetti. Al 59,37%-y Q.K. Toqaevtyń Prezıdent laýazymynda bolǵan kezeńinde eldegi jaǵdaı jaqsardy dep sanaıdy.
Prezıdentke degen senim deńgeıiniń artýy baıqalyp otyrǵanyn aıta ketken jón. Máselen, sáýir aıyndaǵy saýalnamaǵa sáıkes, saýalnamaǵa qatysqan qazaqstandyqtardyń 70%-dan astamy Prezıdentke senim bildirgen.
Senimniń ósý serpini konstıtýsıalyq reformanyń is júzinde júzege asyrylýynyń bastalýymen, alǵashqy Ulttyq quryltaı ótkizý sıaqty iri respýblıkalyq jobalardyń iske asyrylýymen, Memleket basshysynyń birqatar eldegi belsendi syrtqy saıası qyzmetimen jáne el úshin mańyzdy basqa da oqıǵalarmen túsindiriledi.
Qalaisyn.kz platformasynda bıyl 21-23 maýsym aralyǵynda 18 jastan asqan 1200 qazaqstandyq arasynda júrgizilgen aldyńǵy áleýmettik saýalnama nátıjeleri kórsetkendeı, Memleket basshysynyń sońǵy jetistikteriniń arasynda Ulttyq quryltaıdyń qurylýy erekshe joǵary atap ótiledi - qazaqstandyqtardyń 74,52%-y osy bastamany qoldaıdy. Al suralǵandardyń 73,89%-y onyń jumysynyń bastalýyna baılanysty eldegi jaǵdaıdyń jaqsarýyn kútýde.