Ońtústik Koreıanyń Chechhon qalasynda ótken sporttyq gımnastıkadan Azıa chempıonatynda Narıman Qurbanov Qazaqstan quramasyna alǵashqy altyn medaldi syılady, dep habarlaıdy aqshamnews.kz tilshisi.
7 maýsymda Qurbanov at snarádyndaǵy fınaldyq básekede óner kórsetip, 14,933 upaı jınap, birinshi orynǵa ıe boldy. Kúmis júldeni Ońtústik Koreıalyq Hýr Výn (14,633 upaı), al qola júldeni Vetnam sportshysy Dang Ngok Sýan Ten (14,233 upaı) enshiledi. Sondaı-aq úzdik bestikke qazaqstandyq İlıas Azızov te (13,933 upaı) endi.
Osy jeńisimen Qurbanov úsh dúrkin Azıa chempıony atandy. Buǵan deıin ol 2022 jyly at snarádynan kúmis, al 2023 jáne 2025 jyldary komandalyq kópsaıysta eki qola medal jeńip alǵan bolatyn.
Qazirgi tańda Qazaqstannyń erler quramasynyń qorjynynda Azıa chempıonatynan úsh júlde bar. Qurbanovtyń altyn jáne qola medalderinen bólek, Mılad Karımı edendegi jattyǵýdan kúmis medal enshilegen.
Aıta keteıik, chempıonat 8 maýsym, jeksenbi kúni máresine jetedi. Sońǵy jarys kúninde Mılad Karımı týrnık jattyǵýynan júlde úshin synǵa túsedi.
Eske salaıyq, 2024 jyly Parıj Olımpıadasynda Narıman Qurbanov kúmis medal jeńip alǵan bolatyn. Bul – Qazaqstan tarıhyndaǵy sporttyq gımnastıkadan alǵashqy Olımpıada júldesi.