Gınekologıalyq obyrdyń aldyn alýǵa bolady.
Jyl saıyn 1400-ge jýyq qazaqstandyq áıel gınekologıalyq isikten kóz jumady.Bul týraly Qazaq onkologıa jáne radıologıa ǵylymı-zertteý ınstıtýtynyń Onkogınekologıa ortalyǵynyń jetekshisi Erlan Kýkýbasov málimdedi, dep habarlaıdy Almaty-akshamy.kz Baq.kz silteme jasap.
Aıtýynsha, el aýmaǵynda áıelder arasynda anyqtalǵan qaterli isiktiń 11,5%-yn gınekologıalyq qaterli isikter quraıdy.
«Onyń ishinde, belgili bolǵandaı, jatyr moıny obyrynyń 1800 jaǵdaıy, endometrıa obyrynyń 1200-den astam jaǵdaıy, analyq bez obyrynyń 1250 jaǵdaıy, výlva jáne qynap obyrynyń 150 jaǵdaıyna tıesili boldy. Jyl saıyn elimizde gınekologıalyq obyrdan 1 350-ge jýyq áıel kóz jumady. Máselen, 2020 jyly álemde 1,3 mln-nan astam áıelge gınekologıalyq qaterli isik dıagnozy qoıyldy. Olardyń shamamen 44%-y – jatyr moıny obyry, 29%-y – endometrıalyq qaterli isik, 23%-y – analyq bez qaterli isigi jáne 5%-ǵa jýyǵy – basqa gınekologıalyq qaterli isik ekeni anyqtaldy. 2020 jyly búkil álemde 420 000 áıel gınekologıalyq qaterli isikten qaıtys boldy», - dep atap ótti ortalyqtyń basshysy.
Sonymen qatar ol gınekologıalyq obyrdyń aldyn alýǵa bolady dep otyr.
«Turaqty skrınıng pen tekserýler, sondaı-aq salaýatty ómir saltyn tańdaý qaterli isikten qorǵaıdy. Qaterli isik aýrýynyń erte dıagnozymen tipti tolyq emdelýge bolatyndyǵyn este ustaǵan jón. Bıyl endometrıa qaterli isigi basty nazarda bolady. Endometrıalyq qaterli isik aýrýynyń aldyn-alýdyń negizgi sharalary – salaýatty ómir saltyn tańdaý jáne fızıkalyq belsendilikti saqtaý», - dedi dáriger.