Qaýly alǵashqy resmı jarıalanǵan kúninen bastap qoldanysqa engiziledi
Qazaqstanda 10 qarashada Sıfrlandyrý jáne aqparattyq tehnologıalar qyzmetkerleri kúni atalyp ótedi, dep habarlaıdy Almaty-akshamy.kz Úkimettiń baspasóz qyzmetine silteme jasap.
QR Premer-Mınıstri Álıhan Smaıylov «Qazaqstan Respýblıkasyndaǵy merekelik kúnderdiń tizbesin bekitý týraly» Qazaqstan Respýblıkasy Úkimetiniń 2017 jylǵy 31 qazandaǵy №689 qaýlysyna ózgerister men tolyqtyrý engizý týraly» tıisti qaýlyǵa qol qoıdy.
Qaýlyǵa sáıkes 17 mamyrda atalyp ótetin Baılanys jáne aqparattandyrý qyzmetkerleri kúni merekesi Baılanys qyzmetkerleri kúni bolyp ózgertildi.
Jańa kásibı merekeni bekitýge sala qyzmetkerlerin qoldaý maqsatynda Sıfrlyq damý, ınovasıalar jáne aeroǵarysh ónerkásibi mınıstrligi bastamashy boldy. Búginde bul saladaǵy qyzmetkerlerdiń jalpy sany 155 myńnan asady.
Sıfrlyq transformasıa – qoǵamnyń ómir súrý sapasyn jaqsartatyn, eńbek ónimdiliginiń ósýin qamtamasyz etetin, ekonomıkanyń básekege qabilettiligin arttyratyn negizgi faktorlardyń biri. Aqparattyq tehnologıalar salasyndaǵy mamandar eńbek naryǵynda joǵary suranysqa ıe.
Aıta ketsek, bıyl Qazaqstan BUU elektrondyq úkimetti damytý jónindegi reıtıńinde (UN Global e-Government Development Index) 193 memlekettiń ishinde 28-oryndy ıelendi. Atap aıtqanda, «onlaın-qyzmetter sapasynyń ındeksi» boıynsha elimiz 8-orynda.
Qaýly alǵashqy resmı jarıalanǵan kúninen bastap qoldanysqa engiziledi.