Shara barysynda kúshter men quraldardyń el ishinde qozǵalysy oryn alady.
Qazaqstannyń Qorǵanys mınıstrligi elde «Batyl toıtarys – 2022» keshendi vedomstvoaralyq strategıalyq komandalyq-shtabtyq oqý-jattyǵýy jalǵasyp jatqanyn jetkizdi. Atalǵan shara bıylǵy sáýir aıynda ótedi, dep habarlaıdy Almaty-akshamy.kz.
«Oqý-jattyǵý Memleket basshysy – Qarýly Kúshterdiń Joǵarǵy bas qolbasshysy Qasym-Jomart Toqaevtyń armıanyń jaýyngerlik qabiletin túbegeıli arttyrý, kúshtik qurylymdardy tıimdi úılestirýdi qamtamasyz etý, olardyń jedel jáne áskerı-tehnıkalyq úılesimdiligin jolǵa qoıý jónindegi tapsyrmalaryn iske asyrý sheńberinde ótkiziledi», - delingen Qorǵanys mınıstrliginiń habarlamasynda.
Oqý-jattyǵý barysynda kúshter men quraldardyń el ishinde qozǵalysy oryn alady. Bólimsheler oqý-jaýyngerlik tapsyrmalardy pysyqtaý úshin polıgondarǵa marsh jasap, sodan keıin turaqty ornalasý pýnktterine oralady.
Jattyǵý Aqtóbe, Almaty, Atyraý, Jambyl, Qyzylorda, Mańǵystaý, Túrkistan sekildi jeti oblystyń, sondaı-aq respýblıkalyq mańyzy bar Almaty jáne Shymkent qalalarynyń aýmaǵynda ótedi.
Almaty avıasıalyq bazasyndaǵy áskerı avıasıanyń ushqyshtary Mı-17 kóliktik-jaýyngerlik tikushaqtarynda jáne Mı-35M jaýyngerlik tikushaqtarynda Arnaıy operasıalar kúshteriniń taktıkalyq desantyn oqý-jaýyngerlik tapsyrmalardy pysyqtaıtyn aýdandarǵa jetkizý men alyp júrýdi oryndaıdy.
Jospar boıynsha áskerı-kólik avıasıasynyń ekıpajdary S-295 ushaqtarymen Qarýly kúshterdiń bólimshelerin Mańǵystaý oblysyna jetkizýdi júzege asyrady. Olar «Aqtaý-Jańaózen» avtomobıl jolynyń áýeaılaǵyna qonatyn bolady. Arnaıy operasıalar kúshteriniń áskerı qyzmetshileri Mańǵystaý oblysynyń «Oımasha» polıgonynda oqý-jaýyngerlik tapsyrmalardy pysyqtaıdy. Oqý-jattyǵý aıaqtalǵannan keıin bólimsheler ushaqtarmen turaqty ornalasý pýnktterine qaıtarylady.
Bıyl 6-7 sáýirde túngi ýaqytta lekterdiń qozǵalysy kelesi kestede júzege asyrylǵanyn atap ótý qajet:
– «Ońtústik» óńirlik qolbasshylyǵynda – Taraz qalasyndaǵy áskerı bólimnen tehnıka «Mátibulaq» polıgonyna jiberildi;
– «Shyǵys» óńirlik qolbasshylyǵynda – Semeı qalasynyń áskerı bóliminen Aıagóz qalasynyń áskerı bólimine, odan ári «Maılın» polıgonyna jóneltildi;
– Almaty jáne Taldyqorǵan garnızondary áskerı bólimderiniń jeke quramy áskerı avıasıa tikushaqtarynyń búrkemeleýimen «İle» polıgonyna, Qapshaǵaı garnızonynyń áskerı bólimderiniń jeke quramy «Shoshqaly» polıgonyna jiberildi.