Búginde elimizde 72 kásiporyn balyq óńdeýmen aınalysady.
Bul týraly Úkimet otyrysynda Ekologıa, geologıa jáne tabıǵı resýrstar mınıstri Serikqalı Brekeshev aıtty, dep habarlaıdy Almaty-akshamy.kz Inbusiness.kz silteme jasap.
Onyń dereginshe, 2022 jyldyń 10 aıynyń qorytyndysy boıynsha, respýblıkanyń balyq ónimderi naryǵynyń qurylymy kelesideı: aýlanǵany – 42,6 myń tonna, ósirilgeni – 14,1 myń tonna, eksport – 16 myń tonna, ımport – 32 myń tonna.
"Sonymen qatar 2021 jylǵy sáýirde qabyldanǵan Balyq salasyn damytý baǵdarlamasyn iske asyrýdyń nátıjesinde 2030 jylǵa qaraı 270 myń tonnaǵa deıin balyq ósirý, balyq ónimderin ishki tutynýdy jylyna 134 myń tonnaǵa deıin ulǵaıtý jáne ımport kólemin 45 myń tonnadan 25 myń tonnaǵa deıin azaıtý josparlanyp otyr.
Kórsetilgen ındıkatorlarǵa qol jetkizý úshin qazirgi ýaqytta bıznes úshin óndiristik jáne ınvestısıalyq shyǵyndardy sýbsıdıalaý, ákimshilik rásimderdi ońaılatý jáne t.b. qolaıly jaǵdaılar jasalyp jatyr. Jalpy myńnan astam jańa sharýashylyq qurý josparlanyp otyr. Onyń 47-si iri bıznes túri, al ınvestısıanyń jalpy kólemi – 150 mlrd teńgeni qurady", – dedi mınıstr.
Aıta keteıik, búginde elimizde 72 kásiporyn balyq óńdeýmen aınalysady. Onyń 17-si joǵary talaptarǵa saı keledi jáne Eýropalyq Odaq elderine balyq ónimderin eksporttaý quqyǵyn aldy, qalǵandary ishki naryq pen taıaý jáne qıyr shet elderge baǵdarlanǵan. Osy baǵytty qoldaý maqsatynda tereń óńdelgen balyq ónimderin sýbsıdıalaýdy jáne QQS bóliginde salyqtyq jeńildikterdi engizý josparlanýda.