Mereıtoılyq monetalalar úsh myń dana bolyp aınalymǵa tústi. Kúmis monetanyń salmaǵy 31 g, dıametri 33 mm.
Túrkıada Qazaqstan Táýelsizdiginiń 30 jyldyǵyna oraı eskertkish monetalar shyǵaryldy, dep habarlaıdy Almaty-akshamy.kz Qazaqtv.com-ǵa silteme jasap.
Tıyndardyń dızaıny Qazaqstannyń bas konsýldyǵymen birlesip ázirlengen. Monetanyń birinshi betinde Qazaqstannyń memlekettik týy men «Qazaqstan Táýelsizdiginiń 30 jyldyǵy» dep jazylǵan. Syrt jaǵynda Qazaqstannyń kartasy beınelengen. Reverstiń ústińgi jaǵynda Orhon-Enıseı eskertkishterindegideı kóne túrki jazýymen «Túrik» degen jazý tur. Monetany jasaýshylar qazaqtyń qoshqarmúıiz oıýyn da umytpapty.
«Qasterli Táýelsizdigimizdiń 30 jyldyǵyna qatysty erekshe tarıhı belgi qaldyrǵymyz keldi. Usynysymyzdy Túrkıanyń Teńge saraıy qýana qarsy aldy. Myna ázirlenip otyrǵan moneta - Túrkıanyń Qazaqstan Táýelsizdigine, memleketimizge degen erekshe qurmetiniń, iltıpatynyń kórsetkishi. Osy rette Ystambulda Táýelsizdigimizdiń 30 jyldyǵyna arnalǵan merekelik is-sharalardyń jalǵasa beretinin aıtqym keledi», - deıdi Qazaqstan Respýblıkasynyń Ystambuldaǵy bas konsýly Álim Baıel.
«Osmanly ýaqytynda negizi qalanǵan Teńge saraıy ǵasyrlar boıy elimizdiń aqshasyn, kýáligin, pasportyn, memlekettik medaldar men baǵaly qaǵazdaryn basyp shyǵaratyn mekeme boldy. Búgin, mine, tuńǵysh ret Qazaqstanǵa arnap estelik monetasyn shyǵaryp otyrmyz. Baýyrlas el Qazaqstannyń Táýelsizdigin atap ótý - biz úshin de úlken mártebe. Táýelsizdigimiz máńgi bolsyn!» - deıdi Túrkıanyń Teńge saraıynyń dırektory Abdýllah Iasır Shahın.