Stýdentterdiń alǵan bilimderi tájirıbe júzinde qoldanyla bastaıdy.
Jańa oqý jylynan bastap elimizdiń kolejderine akademıalyq erkindik berildi. Bul týraly Oqý-aǵartý mınıstri Asqat Aımaǵambetov Facebook-tegi paraqshasyna jazdy, dep habarlaıdy Almaty-akshamy.kz.
Vedomstvo basshysy kolejderdiń akademıalyq erkindigi týraly túsindirip berdi.
«Buryn oqý josparlary men baǵdarlamalaryn jasaý kezinde kolejder jalpy úlgilik oqý josparlary men baǵdarlamalaryna baılanysty bolatyn. Olardyń mazmunyn 50%-ǵa deıin ózgertýge ruqsat etildi. Sondaı-aq oqý josparynyń bólikteri oqý merzimine baılanysty bolatyn. Al jumys berýshilermen ózara is-qımyl kóbine resmı bolyp, kásibı tájirıbelerdi júrgizý jáne olardyń memlekettik attestasıa komısıalarynyń quramynda bolýy qajet boldy. Oqýyn aıaqtaǵan túlekterdi jumysqa qabyldaǵan jumys berýshilerdiń kolejdermen birlesip jumysqa qabyldaý kezinde olardyń suranystaryna sáıkes keletin bilim berý baǵdarlamalary men praktıkalyq sabaqtardy ázirleýge tolyq múmkindigi bolmady. Endi kolejderge berilgen akademıalyq erkindik bul jaǵdaıdy túbegeıli ózgertedi. Al stýdentterdiń alǵan bilimderi tájirıbe júzinde qoldanyla bastaıdy», – dedi mınıstr.
Onyń aıtýynsha, jańa erejeler boıynsha jumys berýshiler bilim berý baǵdarlamalaryn ázirleýge jáne saraptaýǵa tikeleı qatysady. Iaǵnı kolejder oqý josparlary men baǵdarlamalaryn jalpy bekitilgen standart boıynsha emes, eńbek naryǵynyń, kásiptik standarttyń, óńirlik erekshelikterdiń jáne t.b. suranystaryna qaraı ázirleı alady.
Buǵan qosa kolejderge oqý merzimin anyqtaý quqyǵy berildi. Eger buryn oqý merzimi eki jyldan tórt jylǵa deıin ózgerip, naqty bekitilse, endi ol mamandyqtyń ereksheligine jáne oqý nátıjelerine baılanysty bolady. Nátıjesinde kolejderde stýdentke baǵyttalǵan ortalyq qaǵıdasy qamtamasyz etiledi.
«Sondaı-aq stýdentterdiń mamandyqty tańdaý múmkindigi keńeıip keledi. Biz steıkholderlerdiń (múddeli tarap) ózderin tarta otyryp, bilim berý baǵdarlamalaryn ázirleý olardyń kolejderdegi bilim sapasyna kózqarasyn jaqsarta túsedi dep esepteımiz. Kolejderdiń bilim berý baǵdarlamalaryn jumys berýshilermen birlesip ázirleý algorıtmi qandaı bolady? Ol mamandyqtar boıynsha qajetti quzyretterdi anyqtaýdy, kásiptik standarttardyń talaptaryna jáne jumys berýshilerdiń úmitine sáıkes keletin oqytý nátıjelerin anyqtaýdy; quzyretterdiń ózara baılanysyn, baǵalaý ádisteri men ólshemderin anyqtaýdy; bilim alýshylardyń qajettilikterin zertteýdi; bilim berý baǵdarlamasyn tolyqqandy iske asyrý úshin resýrstardy aıqyndaýdy qamtıdy. Ázirlengen bilim berý baǵdarlamalary saraptamadan ótip, odan keıin barlyǵyna qoljetimdi bilim berý baǵdarlamalarynyń elektrondy tizilimine engiziledi», – dep túıindedi Asqat Aımaǵambetov.