Onyń 6 000-nan astamy Qarýly Kúshterge jiberildi.
Qorǵanys mınıstrliginde Bas shtab bastyǵynyń birinshi orynbasary general-leıtenant Marat Qusaıynovtyń basshylyǵymen kóktemgi áskerge shaqyrý kampanıasy qorytyndylandy, dep habarlaıdy Almaty-akshamy.kz QR Qorǵanys mınıstrliginiń baspasóz qyzmetine silteme jasap.
Keńes barysynda qorǵanys isteri jónindegi departamentterdiń bastyqtary koronavırýstyq ınfeksıanyń taralýy jaǵdaıynda ótken áskerge shaqyrý kampanıasynyń erekshelikteri týraly baıandady.
Qabyldanǵan sanıtarıalyq-epıdemıologıalyq sharalar jıyn pýnktterinde áskerge shaqyrylýshylardyń indetti jappaı juqtyrýyn boldyrmaýǵa, áskerge shaqyrýdy josparly túrde júrgizýge múmkindik berdi.
Áskerge shaqyrý kompanıasy kezinde Uıymdastyrý-jumyldyrý jumystary departamenti buqaralyq aqparat quraldarynda, áleýmettik jelilerde túsindirý jumystaryn júrgizdi.
Sonymen qatar, áskerge shaqyrylýshylar, olardyń týǵan-týystary jedel jeli telefondary arqyly jeke áńgimelesý jolymen týyndaǵan suraqtaryn qoıyp, tolyqqandy jaýap aldy.
Bas shtab bastyǵynyń birinshi orynbasary jergilikti áskerı basqarý organdarynyń barynsha ashyqtyǵyn jáne turǵyndardy ótkiziletin is-sharalar týraly habardar etýdi qamtamasyz etý, áskerge shaqyrylýshylardyń týystarymen turaqty túrde keri baılanys ornatý mindetin qoıdy.
Áskerge shaqyrylýshylarda kezdesetin sıpatty aýrýlarǵa júrgizilgen taldaý anaǵurlym keń taralǵan aýrýlardyń kóz, asqazan-ishek joldarymen, omyrtqamen, nevrologıamen baılanysty ekenin kórsetti.
Mamandar bunyń sebebin jastardyń qımyl-qozǵalysy az ómir saltyn ustanýymen, durys tamaqtanbaýymen jáne gadjetterdi shekten tys paıdalanýymen baılanystyryp otyr.
Osyǵan baılanysty, jergilikti atqarýshy organdarmen ózara is-qımyl jasaı otyryp, tıisti ákimderdiń qaýlylarymen taǵaıyndalatyn medısınalyq komısıalar jumysynyń sapasyn arttyrý tapsyryldy.
Sonymen qatar, general-leıtenant Marat Qusaıynov áskerge shaqyrý jasyna deıingi jáne áskerge shaqyrylatyn jastardy «Jas sarbaz», «Aıbyn» áskerı-patrıottyq qozǵalysyna, basqa da áskerı-patrıottyq jáne sport klýbtaryna barynsha tartý qajettigine nazar aýdardy.