Kezdesýde Qazaqstan men Japonıa arasyndaǵy yntymaqtastyqty odan ári tereńdetýdiń jáne parlamentaralyq yqpaldastyqty nyǵaıtýdyń ózekti máseleleri qarastyryldy.
Qasym-Jomart Toqaev Toshıakı Endoǵa iltıpat bildire otyryp, azamattarymyzdyń japon halqyna qurmeti erekshe ekenin aıtty, dep habarlaıdy Almaty-akshamy.kz Aqordanyń resmı saıtyna silteme jasap.
Memleket basshysy eki el arasyndaǵy senimdi qarym-qatynastyń aıryqsha deńgeıde ekenin atap ótti. Sondaı-aq Japonıa Parlamentiniń Qazaqstanmen dostyq lıgasynyń ózara baılanystardy nyǵaıtýǵa qosqan úlesin joǵary baǵalady.
Qazaq-japon qatynastary salasynda ekonomıkalyq baǵyt mańyzdy ról atqarady. Prezıdent saýda jáne ınvestısıalyq is-áreketterdiń mol múmkindigine nazar aýdaryp, elimizdiń ekonomıkalyq yntymaqtastyqty nyǵaıtýǵa múddeli ekenin aıtty.
Qasym-Jomart Toqaev elimizge 8 mıllıard dollar ınvestısıa quıǵan Japonıa Qazaqstan ekonomıkasynyń eń iri ınvestorlarynyń ondyǵyna kiretinine nazar aýdardy. Sondaı-aq memleketterimiz arasyndaǵy taýar aınalymy 2 mıllıard dollarǵa jetkenin atap ótip, bul kórsetkishti odan ári arttyrý úshin mol áleýet bar ekenin jetkizdi.
Toshıakı Endo kezdesýge múmkindik bergeni úshin Qasym-Jomart Toqaevqa alǵys aıtyp, Japonıa Premer-mınıstri Fýmıo Kısıdanyń joldaǵan hatyn tabystady.
Parlamenttik dostyq lıgasynyń tóraǵasy Japonıa Parlamentiniń barlyq sala boıynsha Qazaqstanmen ózara tıimdi seriktestikti keńeıtýge daıyn ekenin rastady.