Azıanyń álemdik ekonomıkadaǵy róli aıtarlyqtaı artty. Bul týraly «Ortalyq Azıa – Úndistan» samıtinde Memleket basshysy Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Osy samıttiń bizdiń elder arasynda dıplomatıalyq qatynastardyń ornaýyna 30 jyl tolǵan merzimde ótip jatqany sımvoldyq mánge ıe», - dedi Memleket basshysy.
Qazaqstan Prezıdenti osy jyldar ishinde taraptar syndarly saıası dıalog ornatqanyn, turaqty túrde ekonomıkalyq ári gýmanıtarlyq baılanystar nyǵaıtylǵanyn atap ótti.
«Azıa óńiri aýqymdy resýrstarǵa jáne eleýli zıatkerlik áleýetke ıe bolyp otyr. Osynda mańyzdy kóliktik dálizder men jyldam ósip kele jatqan naryqtar shoǵyrlanǵan. Azıanyń álemdik ekonomıkadaǵy róli aıtarlyqtaı artty. Ol ınvestısıa men kaptaldyń tartylýynyń jahandyq jańa ortalyǵyna aınalyp keledi. Bul óz kezeginde bizdiń elder arasynda ózara tıimdi yntymaqtastyqtyń qolaıly múmkindikterin júzege asyrý úshin úlken perspektıvany ashyp otyr. Birinshi kezekte ol saýdaǵa qatysty bolyp tur», - dedi Qasym-Jomart Toqaev.
Onlaın ótip jatqan talqylaýǵa Ózbekstan Prezıdenti Shavkat Mırzıóev, Qyrǵyzstan Prezıdenti Sadyr Japparov, Túrikmenstan Prezıdenti Gýrbangýly Berdimuhamedov, Tájikstan Prezıdenti Emomalı Rahmon qatysyp jatyr.