MÁMS: Almatyda saqtandyrý esebinen eń kóp qoldanylatyn konsýltatıvtik-dıagnostıkalyq qyzmetter qandaı?
2024 jyly almatylyqtar MÁMS esebinen 1156 konsýltatıvtik-dıagnostıkalyq qyzmet túrin paıdalanǵan. Osy jyldyń 9 aıynda Medısınalyq saqtandyrý qory atalǵan qyzmetterge 18,1 mlrd teńge jumsady, dep habarlaıdy MSQ Almaty qalalyq fılıalynyń baspasóz qyzmeti.
Habarlamaǵa súıensek, ońtústik astanada jurtshylyq arasynda akýsher-gınekologtarǵa degen suranys joǵary. Júgingen halyq sanyna shaqqanda odan keıingi oryndarǵa oftalmolog, nevrapotolog, hırýrg, otorınolarıngolog jáne endokrınolog mamandar jaıǵasqan.
MÁMS paketinde tıreotropty gormon (TTG), D dárýmeni, erkin tıroksın (T4), jatyr moınynan alynǵan materıaldy sıtologıalyq tekserý (PAP-test jáne gemokýlt-test) syndy zertteýlerge degen suranys joǵary.
Al, eń qymbat analız – genniń mýtasıaǵa ushyraý deńgeıin anyqtaıtyn KRAS analızi. PSR ádisimen jasalatyn analız isik paıda bolǵan tinnen alynady. Test organızmde glúkozaǵa toleranttylyqtyń qanshalyqty buzylǵanyn anyqtap, qant dıabetin klınıkalyq belgiler baıqalmaı turyp erte anyqtaýǵa kómektesedi. MÁMS paketinde bul analız shamamen 108 myń teńge turady.
Konsýltatıvtik-dıagnostıkalyq qyzmetter arasynda eń qymbaty – MARS jasandy baýyr apparaty arqyly jasalatyn albýmındi dıalız, quny 2,1 mln teńge. Medısınalyq kómektiń bul túri baýyr jetkiliksizdigimen aýyratyn naýqastarǵa kórsetiledi.
Kompúterlik dıagnostıka arasyndaǵy eń qymbaty – bir fotondy emıssıondy kompúterlik tomografıa, quny 87 myń teńge.
Fılıal sarapshylarynyń sózine súıensek, saqtandyrý engizilgeli beri KT men MRT-ǵa degen suranys artqan. 2024 jyldyń 9 aıynda 35 myń kompúterlik tomografıa jasalǵan, oǵan Qor 594,8 mln teńge tóledi. Sonymen qatar, 48 myń MRT qyzmeti úshin 686,8 mln teńge tólengen.
Usynylyp otyrǵan málimetter MSQ Analıtıka ortalyǵynan alyndy. Ortalyq medısına salasyndaǵy aýqymdy málimetterdi jınaqtap, analız jasaýǵa, tıimdi sheshimder qabyldaýǵa múmkindik beredi. Búgingi kúni Analıtıka ortalyǵy arqyly 500-ge jýyq aýqymdy kórsetkish vızýalızasıalandy. Power BI, Superset, QlikSense baǵdarlamalarynyń kómegimen 18 bazadan málimet jınaqtalady. Bul medısına salasynda týyndaǵan qaýip-qaterlerdi saralap, medısınalyq qyzmet sapasyn jaqsartýǵa múmkindik beredi.