Saýda orny ashyq alańda ornalasqan.
Búgin Almatyda Qala kúnine oraı jańartylǵan «Saryarqa» bazarynyń ashylý rásimi ótti. Mańyzdy ámbebap nysan 437 dúkenge shaqtalyp qaıta jasaqtalyp otyr. Sondaı-aq, megapolıstiń barlyq aýdanynda sanıtarlyq talaptarǵa saı merekelik jármeńkeler uıymdastyrylýda, dep habarlaıdy Almaty-akshamy.kz Almaty.tv-ge silteme jasap.
Qala kúnin atap ótý aıasynda Áýezov aýdanynda jańartylǵan «Saryarqa» bazarynyń saltanatty ashylý rásimi ótti. Buǵan deıin ashyq alańda ornalasqan saýda ornynyń búgingi keıipine jergilikti halyq dán rıza. Modernızasıalanǵan ámbebap bazar aldaǵy ýaqytta taǵy keńeıtilip, 400-den asa saýda dúkeni esigin aıqara ashpaq. Jalpy aýmaǵy 1500 sharshy metrge jetetin nysannyń qurylysy tolyq 2024-inshi jylǵa deıin aıaqtalady dep josparlanýda.
«Eki jyl buryn osy jerde saýda dúkenderi men konteınerler bolǵan edi. Qysta jylýy joq. Al, jazda sanıtarlyq talaptarǵa saı kelmeıtin oryn bolatyn. Qazirgi tańda «Saryarqa» bazarynyń birinshi kezeńi aıaqtalyp, jaqsy oryndar jasaldy. Adamdar kelip demalsa da, tamaqtansa da, saýda jasasa da yńǵaıly», - dedi Áýezov aýdanynyń ákimi Saıran Saıfedenov.
Áýezov aýdanyndaǵy merekelik shara Natalá Sas atyndaǵy balalar men jasóspirimder teatrynyń aldynda jalǵasyn tapty. Munda dástúrli aýylsharýashylyǵy jármeńkesi uıymdastyrylyp, Almatyny álemge áıgili etken «Aport» almalary turǵyndarǵa usynyldy. Jergilikti halyq mundaı sharalardyń ótýi shahardyń damýyna mol úles qosady, deıdi.
«Qazir men tús kórgendeı bolyp turmyn. Keshe ǵana tap-taza jer búgin jaınap ketipti. Barlyǵy oryn-ornymenen, halyqty oılaǵandary úshin raqmet! Bári tómen baǵamen satylyp jatyr», - dedi Áýezov aýdanynyń turǵyny Sársebala Kópebaeva.
Dál osyndaı jármeńke megapolıstiń barlyq aýdandarynda uıymdastaryldy. Almatynyń sımvolyna aınalǵan almalardyń túrli sortty Jetisý men Naýryzbaı, Bostandyq aýdanyndaǵy jármeńkelerinde de qoıyldy. Qala kúniniń osylaı erekshe ótýine atsalysqan saýdagerler et pen sút ónimderin de arzan baǵamen satyp, kelýshilerdi qýantty.
«Bul - qazaqstandyq, erekshe sortty almalar. Biz olardy arnaıy sharýa qojalyǵynda ósirip, jan-jaqta satamyz. Mine «Aport», «Azergold», «Sınap», «Sulý bıkesh», myna jerde «Lımonka» jáne «Amerıkanka» bar. Almanyń bári óte dámdi», - dedi saýdager Mıras Qýandyq.
Kózdiń jaýyn alatyn zergerlik zattar men ulttyq naqyshtaǵy bas kıimder. Bul Almaly aýdanyndaǵy jármeńke sóreleri. Jergilikti sheberler bıyl da ózderi qoldan jasaǵan buıymdarymen almatylyqtardy tánti etýde.
Almaly aýdanynda aýqymdy túrde uıymdastyrylǵan jármeńkeniń eń basty ereksheligi - munda mýzykalyq aspaptar da satylymǵa qoıylypty. Máselen biz oınaǵan myna qural «Glúkofan» dep atalady eken. Sheberdiń aıtýynsha, zamanaýı úlgidegi aspap eń alǵash 2007 jyly Domınıkanada oılap tabylǵan. Qazir sánnen qalmaǵan bizdiń otandyq sheberler muny Almatyda óndirip, satyp otyr. Sonyń ishinde, qazaqtyń ulttyq aspaby - shańqobyzdy sórelerden tabýǵa bolady.
Jalpy bıyl qala boıynsha uıymdastyrylǵan sharada 100 tonna alma men 40 tonna kókónis jáne ózge de azyq-túlik taýarlary usynylǵan. Merekelik jármeńkeler demalys kúnderi 26 qyrkúıekke deıin jalǵaspaq.