Qazaqstanda kıberbýllıng máselesi qaıta talqylanyp jatyr. Buǵan ánshi Qaırat Nurtastyń qyzyna qarsy jeli qoldanýshylardyń jappaı jazǵan qorlaý pikirleri sebep boldy. Oqıǵaǵa baılanysty Oqý-aǵartý mınıstrligi men zańgerler pikir bildirdi, - dep habarlaıdy aqshamnews.kz 31 arnaǵa silteme jasap.
Tanymal telejúrgizýshi Dınara Sátjannyń úndeýi Qazaqstandaǵy kıberbýllıng máselesin qaıtadan kún tártibine shyǵardy. Jýrnalıs óz kezeginde Qaırat Nurtastyń qyzyna baǵyttalǵan teris pikirlerdiń kesirinen kúızeliske túskenin birneshe ret kórgenin aıtqan.
"Bul - barlyq balaǵa qatysty másele. Bizde zań bar jáne bul qylmystyq jaýapkershilikti týdyrýy múmkin. Pikir jazatyndar kóbine balalar emes, eresek adamdar", - dedi Sátjan.
Qazaqstanda kámeletke tolmaǵandarǵa qatysty ujymdyq qorlaýǵa jáne ınternet arqyly qorlaýǵa qarsy jaýapkershilik bar. Eń mańyzdysy - balanyń bul týraly eresekterge qoryqpaı aıtýy, ári odan keıin quqyq qorǵaý organdary shara qoldanýy tıis.
"Eger bizge mundaı aqparat kelip tússe, árıne, biz Mádenıet jáne aqparat mınıstrligine júginemiz. Olar óz kezeginde ýákiletti organdarǵa - UQK-ǵa júginedi. Sonymen qatar bizde aqparattyq kıberbaqylaý júıesi bar jáne biz ony belsendi qoldanamyz", - dedi Oqý-aǵartý mınıstrliginiń Balalardyń quqyqtaryn qorǵaý komıteti basqarmasynyń basshysy Lázzat Esmuhanova.
Eresekterdiń jaýapkershiligi týraly zańgerler de eskertti.
"Osyǵan baılanysty moraldyq zıandy óteý talap etýge bolady. Qorlaý áreketimen aınalysatyndar muny túsinip, bilýi kerek. Eger aýyr saldary bolsa, onda qylmystyq jaýapkershilik te qarastyrylýy múmkin", - dedi zańger Sergeı Ýtkın.