Atyraýda denesi segiz aıdan keıin tabylǵan Iana Legkodımovanyń ólimine qatysty sot jalǵasyp jatyr. 23 jastaǵy boıjetkendi óltirgender marqumnyń uıaly telefonyn emin-erkin paıdalanǵany anyqtaldy. Kúdiktiler Iananyń atynan dostaryna tún ishinde jazba jiberip, qylmysyn jasyrmaq bolǵan. Keıin basty kúdikti Rızýan Qaıyrjanov ekeýara jazbany túgel óshirip tastaǵan. Al marqumnyń anasynyń aıtýynsha, Ianany tunshyqtyryp óltirmes buryn, qos kúdikti qyzdy ábden azaptaǵan, - dep habarlaıdy aqshamnews.kz tilshisi "KTK" arnasyna silteme jasap.
Iana Legkodımovany aıýandyqpen óltirgen kúdiktiler onyń uıaly telefonyn alyp, kýrstasyna jazba jibergen. Anasynyń aıtýynsha, munyń bári qylmysty jasyrý maqsatynda jasalǵan. Keıin marqumnyń ol dosy tergeýge shaqyrylyp, tipti kúdikke ilingen.
"Alǵashqy kúni ony da shaqyrdy. Ne sebep bolǵanyn bilmeımin, Rızýandy jiberip qoıyp, ony alyp qalǵan. Bekanyń moınyna qyzymnyń ólimin ilgisi keldi. Ol keıin qaladan ketip qaldy. Basqa óńirdiń jigiti. Psıhologıalyq turǵydan aýyr tıgen", - dedi marqumnyń anasy Galına Legkodımova.
Sottalýshy Rızýan Qaıyrjanov tergeýde "Ianadan taıaq jedim" dep túsinikteme beripti. Iaǵnı marqum oǵan qol jumsap, tunshyqtyrdy degen. Alaıda anasy munyń bárin joqqa shyǵardy.
"Mektepte, ýnıversıtette, tipti kóshede birde‑bir adammen ursysyp kórgen emes. Urys-keriske joq edi. Uryp-soqpaq túgili, daýysyn qatty kótermeıtin. Qyzymdy tunshyqtyryp jatqanda, ol tipti qarsylyq ta kórsete almaǵan. Qylmyskerdiń ústinde birde-bir syzat joq. Óıtkeni qyzymnyń kishkentaı qol súıekterin syndyryp tastaǵan. Qyzym óte názik edi", - dedi marqumnyń anasy Galına Legkodımova.
Marqumnyń boıy 160-162 santımetr, salmaǵy bar-joǵy 40 keli eken. Anasynyń aıtýynsha, qyzyn tek tunshyqtyryp óltirmegen, uryp-soǵyp azaptaǵan. Prokýror qylmystyq is barysynda alynǵan aıǵaqtardy ashyp kórsetti. Segiz aıdan keıin tabylǵan súıek qaldyqtaryn marqumnyń tis shetkasynan alynǵan DNK synamamen ázer anyqtapty. Aıǵaqtar arasynda máıitimen birge tabylǵan jeıdesi de bar. Sottalýshy taraptyń qorǵaýshysy keıbir dálelderge qarsylyq bildirgenmen, aıyptalýshy kinásin ózi moıyndady.
Aıta keteıik, 23 jastaǵy boıjetkendi óltirdi degen kúdikpen 24 jastaǵy Rızýan Qaıyrjanov pen onyń 25 jastaǵy dosy Altynbek Katımov qamaýǵa alynǵan.