Almatynyń Qala qūrylysyn baqylau basqarmasy qūrylys normalaryn óreskel būzǵan merdíger ūıymdarǵa qatysty qabyldanyp jatqan sharalar turaly habarlady.
Keshe "AsiaMah" JShS-í Ábísh Kekílbaıūly kóshesíndegí syrtqy káríz jelísín qaıta jańartu jūmysy boıynsha, sondaı-aq "SK 7 stroı" JShS-í kórkeıtu jáne bílím beru nysandaryndaǵy qūrylys jūmysy úshín qūrylys lıtsenzıyasynan aıyryldy.
Basqarma taǵy bírqatar ūıymǵa qatysty sharalar qabyldanǵanyn habarlady. Memlekettík "№174 mektep-gımnazıyasy" ǵımaratyna salynǵan qosymsha nysannyń qūrylysy boıynsha júrgízílgen jospardan tys tekseru barysynda jobalyq sheshímderden auytqu jáne memlekettík qūrylys normalarynyń saqtalmauy anyqtaldy. Osyǵan baılanysty "Qūrylysshy-TBS" JShS qūrylys qyzmetíníń bírqatar kíshí sanaty boıynsha lıtsenzıyasynan aıyryldy.
Aıta keteıík, būǵan deıín tehnıkalyq qadaǵalaudy tıísínshe oryndamaǵan "Alatau sapa qūrylys" JShS akkredıtatsıyasynan aıyrylǵan bolatyn. Ūıym qyzmetkerleríníń baqylaudy dūrys júrgízbeuí Yassauı men Dastan kósheleríníń qıylysynda asfalt jabyndysynyń opyryluyna sebep bolǵan. Sondaı-aq, Amanjol kóshesíndegí jol jabyndysynyń shóguíne jol bergen "Arkada KZ" JShS ákímshílík jauapkershílíkke tartyldy.
Atalǵan nysandarda jūmys júrgízgen ekí merdíger ūıym da ákímshílík jauapkershílíkke tartylyp, anyqtalǵan būzushylyqtardy joyu turaly nūsqama beríldí.
Qala qūrylysyn baqylau basqarmasynda atap ótkendeı, qala ákímí Darhan Satybaldynyń tapsyrmasyna sáıkes qūrylys nysandaryna baqylau kúsheıtíldí, jáne anyqtalǵan būzushylyqtar boıynsha sharalar zańnamaǵa saı qabyldanady.