İshki ister mınıstrligi Ákimshilik polısıa komıtetiniń erekshe tapsyrmalar jónindegi aǵa ınspektory Aqtoty Boranova brıfıń barysynda jol apaty saldarynan ólim-jitim jıi bolatyn óńirlerdi atady, dep habarlaıdy QazAqparat tilshisi.
«Qala syrtyndaǵy jol apattardan ólim-jitim Almaty, Jambyl, Jetisý, Aqtóbe, Atyraý, Aqmola, Túrkistan jáne Mańǵystaý oblystarynda kóp bolady. Mysaly, 2023 jyldyń 9 maýsymynda Jambyl oblysynda, «Almaty – Tashkent» avtojolynda «Lexus570» markaly avtokóliktiń júrgizýshisi rúlge ıe bola almaı qalyp, jol jıegindegi jyraǵa aýdarylǵan. Apat saldarynan júrgizýshi men onyń eki jolaýshysy oqıǵa ornynda kóz jumyp, taǵy bir jolaýshy aýrýhanaǵa jetkizildi», - dedi Aqtoty Boranova.
Sondaı-aq İİM ókili jol boıyndaǵy balalardyń qaýipsizdigi máselesine toqtalyp ótti.
«Jazǵy kanıkýlda balalardyń qatysýymen bolatyn jol-kólik oqıǵalary erekshe alańdaýshylyq týǵyzady. Jyl basynan elimiz joldarynda kámeletke tolmaǵan balalar otyrǵan kólikter 1 046 ret jol apatyna túsken. Onyń saldarynan 72 bala qaza taýyp, 1152 bala jaraqat aldy. Ókinishke qaraı, kún saıyn joldarda bir bala qaza taýyp, 10-nan astamy zardap shegedi. Apattan mert bolǵan balalardyń 67%, ıaǵnı jartysynan astamy jolaýshylar, al qalǵan bóligi jaıaý júrginshiler», - deıdi ol.