Prezıdent Samarqand qalasynda ótetin Túrki memleketteri uıymynyń Samıti aıasynda Majarstan Premer-mınıstri Vıktor Orbanmen kezdesti, dep habarlaıdy Almaty-akshamy.kz Inform.kz-ke silteme jasap.
Memleket basshysy Qazaqstan men Majarstan arasyndaǵy qarym-qatynasty, onyń ishinde ekonomıkalyq yntymaqtastyqty odan ári nyǵaıtýǵa nıetti ekenin bildirdi.
«Bizdiń elder arasyndaǵy baılanys jaqsy damyp kele jatyr. Áıtse de biz eki memlekettiń yntymaqtastyǵyna tyń serpin berýimiz kerek dep oılaımyn. Ásirese, aradaǵy saýda aınalymynyń kólemi áli de qanaǵattanarlyq deńgeıde emes. Bul baǵytta eki eldiń de áleýeti zor. Majarstan – Qazaqstan úshin mańyzdy seriktes el. Siz Premer-mınıstr retinde bizdiń túrli saladaǵy yntymaqtastyǵymyzdy ilgeriletýge kóp eńbek sińirip kele jatqanyńyzdy bilemin», – dedi Memleket basshysy.
Óz kezeginde Majarstan Premer-mınıstri Vıktor Orban ekijaqty kezdesýdi uıymdastyrǵany úshin Qazaqstan tarapyna alǵys aıtty.
«Qazaqstan men Majarstan arasyndaǵy qarym-qatynastyń orny erekshe. Men osydan birneshe jyl buryn alǵash ret Premer-mınıstr qyzmetin atqarǵanda Qazaqstan men Majarstannyń mádenı, ekonomıkalyq baılanystary óte berik bolǵanyn bilemin. Endi eki eldiń yntymaqtastyǵyna bıznes ókilderi tyń serpin berýi kerek. Qazaqstannyń iri kompanıalary Majarstanǵa ınvestısıa quısa, ekonomıkalyq qarym-qatynasymyz jańa deńgeıge kóteriler edi», – dedi Majarstan Premer-mınıstri.
Kezdesýde Qazaqstan men Majarstan arasyndaǵy mádenı-gýmanıtarlyq baılanystar, sondaı-aq halyqaralyq jáne aımaqtyq kún tártibindegi máseleler talqylandy.
Sýret: Inform.kz