Zań kásiptik biliktilikti taný tártibine baılanysty qoǵamdyq qatynastardy retteýge baǵyttalǵan.
Búgin Memleket basshysy Qasym-Jomart Toqaev "Kásiptik biliktilik týraly" zańǵa qol qoıdy, dep habarlaıdy Almaty-akshamy.kz Aqordaǵa silteme jasap.
Sondaı-aq Memleket basshysy "Qazaqstan Respýblıkasynyń keıbir zańnamalyq aktilerine kásiptik biliktilik, memlekettik nagradalar, áleýmettik qamsyzdandyrý jáne bilim berý máseleleri boıynsha ózgerister men tolyqtyrýlar engizý týraly" Qazaqstan Respýblıkasynyń Zańyna qol qoıdy.
QR Eńbek jáne halyqty áleýmettik qorǵaý mınıstrligi "Kásiptik biliktilik týraly" jáne "Qazaqstan Respýblıkasynyń keıbir zańnamalyq aktilerine kásiptik biliktilik máseleleri boıynsha ózgerister men tolyqtyrýlar engizý týraly" zańdardyń jobasyn ázirledi.
Vedomstvo ókilderiniń málimdeýinshe, zań jobalary Ulttyq biliktilik júıesinde belgili bir kásip túrin nemese eńbek qyzmetiniń túrin júzege asyrýǵa úmitker jeke tulǵanyń kásiptik biliktiligin taný tártibine baılanysty qoǵamdyq qatynastardy retteýge baǵyttalǵan.
Sondaı-aq zań jobasynda kandıdattardyń kásiptik biliktilikterdi taný rásiminen ótý quqyqtary, kásiptik biliktilikterdi erikti negizde taný sharttary men tártibi aıqyndalady.