Bul ıpotekanyń bastapqy jarnasy 10 paıyz jáne syıaqy stavkasy 2-den 5 paıyzǵa deıin bolmaq.
Memleket basshysy monoqalalardan qonys aýdarýshylar úshin jeńildetilgen ıpoteka baǵdarlamasyn ashýdy tapsyrdy, - dep habarlaıdy Almaty-akshamy.kz
Úkimetke óńirlerdi damytýdyń jalpyulttyq jobasy aıasynda monoqalalardy damý áleýeti tómen óńirler qatarynan shyǵarý tapsyryldy.
«Bul azamattardy mamandarǵa muqtaj, bolashaǵy zor, damyp kele jatqan qalalarǵa erikti túrde qonys aýdarýǵa yntalandyrady. Ónerkásiptik monoqala turǵyndarynyń ınjenerlik kásipterde biliktiligi men tájirıbesi bar ekenin jaqsy bilemiz», - dedi Qasym-Jomart Toqaev Ekibastuzdaǵy keńeste.
Toqaev Memlekettik turǵyn úı saıasaty aıasynda jeke bólim damý áleýeti tómen monoqalalardan qonys aýdarýshylarǵa arnalýy tıis ekenin aıtty.
«Otbasy bank» júıesinde mundaı turǵyndar úshin bastapqy jarnasy 10 paıyz jáne syıaqy stavkasy 2-den 5 paıyzǵa deıingi jeńildiktegi ıpoteka baǵdarlamasyn kózdeý kerek. Úkimet ákimdiktermen birlesip bul bastamany jan-jaqty pysyqtaǵany jón», - dedi Toqaev.
Prezıdenttiń aıtýynsha, monoqalalardyń ekonomıkasyn ártaraptandyrýda jáne shaǵyn jáne orta bıznesti damytýda jańa óndiris oryndaryn qurý jobalary mańyzdy ról atqarady. Úkimet 20 myń jumys ornyn qurýmen quny 2 trıllıon teńgege 79 jobany iske asyryp jatyr.
«Alaıda, úsh monoqalada jańa óndiris oryndaryn qurý jobalary toqtatyldy, Aqsaı qalasynda bul jobalar tolyq júktelmegen. Jańadan josparlanǵan 19 jobanyń 14-i nemese 75 paıyzǵa jýyǵy Pavlodar jáne Qaraǵandy oblystaryna tıesili. Jańatasta baıytý fabrıkasyn salý jobasy iske asyrylyp jatyr. Strategıalyq ınvestormen kelisimge qol qoıyldy, ınvestısıa kólemi shamamen 1 mıllıard dollar. Biraq kelisimdi ratıfıkasıalaý rásimi keıinge qaldyrylǵan. Úkimetke kóterilgen barlyq másele boıynsha jedel túsinip, esep berýdi tapsyramyn. Bul rette kvazımemlekettik sektor tarapynan jobalardy ekonomıkalyq jaǵdaılardy esepke almaı, tolyq júkteýge bolmaıdy», - dedi memleket basshysy.