Memleket basshysy Qasym-Jomart Toqaev «Batyl toıtarys-2023» strategıalyq komandalyq-shtabtyq áskerı oqý-jattyǵý jıynyn baryp kórdi.
Prezıdent – Qarýly Kúshterdiń Joǵarǵy Bas qolbasshysy Qasym-Jomart Toqaevtyń basshylyǵymen «Jaǵalaý» oqý-jattyǵý polıgonynda «Batyl toıtarys-2023» strategıalyq komandalyq-shtabtyq áskerı oqý-jattyǵý jıyny ótti, dep habarlaıdy Almaty-akshamy.kz.
Qasym-Jomart Toqaev oqý-jattyǵý jıynyn baqylaý munarasynan tamashalady.
Áskerı ádis-tásilder kórseter aldynda Memleket basshysyna general-maıorlar Bolat Jorabaev pen Almaz Jumakeev qorǵanys operasıasy kezindegi Arnaýly operasıalar kúshteri men Desanttyq-shabýyldaý áskerleriniń áreketi jóninde baıandady.
Desanttyq-shabýyldaý áskerleriniń brıgadalyq-taktıkalyq toptary avıasıanyń qoldaýymen, sondaı-aq Qurlyq áskerleri jáne Arnaýly operasıalar kúshteriniń bólimshelerimen birlese otyryp, sýdan ótý arqyly qarsy jaǵalaýdaǵy jaý shebin basyp alý úshin taktıkalyq is-qımyl júrgizdi.
Al Arnaýly operasıalar kúshteri men Ulttyq ulan bólimsheleri shartty jaý qolyna ótken Qapshaǵaı GES-in azat etti. Tótenshe jaǵdaılar mınıstrliginiń bólimsheleri tehnogendik apat saldaryn joıýmen aınalysyp, halyqqa gýmanıtarlyq kómek kórsetý mindetin atqardy.
Qarýly Kúshterdiń Bas shtaby ázirlegen biryńǵaı jospar men maqsatqa sáıkes áskerler oqý-jattyǵý jıyny ótetin aýdandarǵa strategıalyq turǵyda qaıta toptastyryldy.
Atap aıtqanda, Áskerı-teńiz kúshteri avıasıanyń jáne Arnaýly operasıalar kúshteriniń qoldaýymen Kaspıı teńizi akvatorıasyndaǵy ekonomıkalyq qyzmet nysandarynyń qaýipsizdigin qamtamasyz etti.
Almaty, Qaraǵandy, Soltústik Qazaqstan jáne Abaı oblystaryndaǵy polıgondarda da osyndaı oqý-jaýyngerlik mindetter oryndaldy.