Jasóspirim mekeme ishindegi astyrtyn áreketterdi aıtyp berdi
“Imamdardy jolatpaı, juma namaz jabyq túrde oqyldy”. Almatydaǵy pansıonattardyń birinde turǵan jasóspirim mekeme ishindegi astyrtyn áreketterdi jaıyp saldy. Onyń aıtýynsha, qaıyrymdylyq qoryna qaraıtyn jataqhanada tipti shetel azamattary dinı taqyrypta emtıhan tapsyrtqan. Este bolsa, buǵan deıin aqparat kózderinde quzyrly organdardyń dál osyndaı balalar pansıonatyna qatysty qylmystyq is tergep jatqany aıtylǵan edi, dep habarlaıdy Almaty-akshamy.kz Almaty.tv-ge silteme jasap.
“Ol jaqqa barǵaly ımamdardy kórgen joqpyn”, – deıdi jasóspirim.
Atyn jarıa etý turmaq, túrin kórsetýge qoryqqan jasóspirim daýsyn da ózgertýdi surady. Alaıda ol pansıonat qyzmetkerleriniń jasyryn áreketin jasyrmaı aıtyp berdi. Sózine sensek, ózderin "ustaz" degizgender jabyq ári júıeli túrde dinı joralǵylar ótkizgen. Tipti ózge tilde dáris bergen kezderi de bolypty.
"Sosyn ustazdyń ózi bir sózinde aıtqan. "Biz zańsyz júrip jatyrmyz" dedi. Juma kúni tekseris keldi. Sol kúni juma namazy bolmady. Kitaptardyń bárin tyǵyp tastady. Bizge aldyn ala eskertip qoıdy. "Tekseris kelse, kitaptardy sórege salyp tastańdar. Bir kitap bolmasyn” dep”, – deıdi jasóspirim.
Jasóspirim "jaǵdaıdy birden ata-anama aıtýǵa o basta batylym barmady" deıdi. Alaıda keıin shyndyqty jasyrmaı, is nasyrǵa shappaı turǵanda mekemeden birjola ketýdi jón sanapty. "Pansıonattyń balalardy shetelge jiberetini týraly aıtylǵanda" senbedik. Biraq myna azamattyń aıtýy boıynsha, onyń tuńǵysh uly da, tipti ózi de "ustazdardyń" sózine erip, balasyn jat elge attandyrypty.
“Balalar ushaqqa otyrǵannan keıin mundaǵylar birden basyn ala qashty. Basynda balamdy "eń myqty ýnıversıtetke oqýǵa túsiremiz" dep sendirdi. Oǵan men qýanyp, aram oıym bolmady. Keıin ulym da, birge ketken 70 bala da ýnıversıtette emes, medrese atyn jamylǵan mekemede turǵany belgili boldy. Onda baskóz bolǵan "ustazsymaqtar" olarǵa kúsh qoldanǵan”, – deıdi ata-ana.
Quzyrly organdar dereginshe, mundaı pansıonattar Almatyda ǵana emes, eldiń ózge óńirlerinde de bar. Jalpy sany 90-nan asady jáne barlyǵy bir qaıyrymdylyq qoryna qaraıdy. Buǵan deıin olar Múftıatpen memorandým jasasý arqyly jumys istegen.
“Din boıynsha, zań boıynsha zańsyzdyqtar tabylyp jatqannan keıin, QMDB "Jibek joly" qaıyrymdylyq mekemesimen jasasqan memorandýmdy toqtatty”, – dedi QMDB Almaty qalasy boıynsha pátýa baǵytyna jaýapty maman Elbek Tasbolatuly.
Dintanýshynyń aıtýynsha, "medrese" atyn jamylǵandar ımamdardy jolatpaı, úı ishinen úı tigip, óz erejesimen júrýiniń ózi - qoǵamǵa tóngen qaýip.
“Der kezinde myna dertti emdemese, "súleımenshilerdi" qolǵa almaǵan jaǵdaıda, olar da kúsh jınaǵan kezde shynaıy betperdelerin kórsetedi. Birinshiden, Dinı basqarmaǵa baǵynbaǵany úlken qaýip tóndiredi. Ekinshiden, ózderiniń jasyryn qulshylyqtary sharıǵatqa qaıshy bolǵandyqtan, ol da bir qaýip”, – dedi teolog Rýslan Qaıyrgeldi.
Qańtar aıynda áleýmettik jelide taraǵan beınejazbaǵa tártip saqshylarynyń pansıonattar mańynda júrgeni taspalanǵan. Polısıa departamentiniń ókilderi sol kezde tekserý júrgizilip, oqıǵa ornynan "Qazaqstanda ekstremıstik dep tanylǵan jáne taratýǵa tyıym salynǵan materıaldar tabylǵanyn" habarlady.
“Pansıonattyń ishinde jasóspirimder zańsyz dinı joralǵylar jáne ujymdyq duǵalarǵa qatystyryldy. Al kelispegen kishkentaı balalarǵa qysym kórsetken. Tamaq, sý bermeı, keı kezde qol kótergen. Osy derekter belgili bolǵannan keıin polısıa tarapynan is-áreket jasaldy. Qazirgi tańda qylmystyq is tergeý basqarmasynda”, – dedi polısıa departamentiniń resmı ókili Saltanat Ázirbek.
Polısıa ózge aqpar tergeý múddesine saı jarıa etýge jatpaıtynyn málimdedi. Búginde egjeı-tegjeıli tekserý jumystary júrgizilip jatqanyn ǵana aıtty.