Gastarbaıterlerge qurylys alańynda jumys istegeni úshin jaqsy jalaqy tóleıtini unaǵan.
Qala aýmaǵynda respýblıkalyq «Mıgrant» jedel-aldyn alý is-sharasy ótip jatyr. Onyń barysynda Jarokov kóshesindegi jańa turǵyn úı kesheni sheteldik jumys kúshimen salynǵany belgili bolǵan, dep habarlaıdy Almaty-akshamy.kz Polisia.kz-ke silteme jasap.
«Bul derekti biz 20 aqpanda bastalǵan “Mıgrant” respýblıkalyq is-sharasy barysynda anyqtadyq. Jaqynda qurylys nysandarynyń birinde júrgizilgen tekserý kezinde zańsyz jumys istegen Ózbekstannyń 19 azamaty anyqtaldy: olardyń keıbireýleri bir aıdan astam ýaqyt buryn, keıbireýleri osy qurylys nysanyna 10 kún buryn kelgen. Eń aldymen, Qazaqstan Respýblıkasynyń kóshi-qon zańnamasyn óreskel buzǵan sheteldikterdiń ózderi de, olardyń jumys berýshileri de jaýapkershilikke tartyldy. Sonymen qatar ustalǵandardyń jeke basynyń zańsyz áreketterge qatysy bar-joǵy tekseriletin bolady. Ákimshilik is materıaldary sotqa joldanady», — dedi Almaty qalalyq PD kóshi-qon qyzmeti basqarmasynyń bastyǵy Asqat Býtýnchınov.
«Mıgrant» jedel-aldyn alý is-sharasynyń maqsaty – tıisti qoǵamdyq tártipti saqtaý, sheteldikterdiń Qazaqstan Respýblıkasynda bolý erejelerin buzý derekterin anyqtaý.
«İs-sharanyń úsh kúninde kóshi-qon zańnamasyn buzǵany úshin 536 adam ákimshilik jaýapkershilikke tartyldy, 44 sheteldik Qazaqstannan shyǵaryldy. Sonymen qatar sheteldikterdiń Qazaqstan Respýblıkasynda bolýynyń zańdylyǵyn qamtamasyz etý sharalaryn qoldanbaǵany úshin 224 qabyldaýshy tarap jaýapkershilikke tartylsa, QR sheteldik jumys kúshin tartý erejelerin buzǵany úshin 24 jumys berýshige aıyppul salyndy. Sondaı-aq jeke basyn kýálandyratyn qujaty joq 338 sheteldik azamat qabyldap-taratý pýnktine ornalastyryldy», – dedi Almaty qalalyq PD kóshi-qon qyzmeti basqarmasynyń bastyǵy Asqat Býtýnchınov.