Úkimet 2025 jylǵa qaraı 41 mlrd AQSH dollary kólemindegi taýarlar men qyzmetterdiń shıkizattyq emes eksportyna qol jetkizýdi kózdeıdi
Otandyq óndiristiń qazirgi deńgeıi ishki suranysty qamtýǵa qaýqarsyz. Osynyń ózi ımportqa táýeldi etedi. Taýardy syrttan ımporttaı otyryp, biz Qazaqstanǵa álemdik ınflásıanyń enýine esik ashamyz. Onyń ústine, sheteldik taýarlarǵa aqy tóleý kezinde sheteldik valútaǵa suranys týyndaıdy, osylaısha aıyrbas baǵamy qysym kóredi, deıdi Qazaqstan Ulttyq Bankiniń Tóraǵasy Ǵalymjan Pirmatov.
Qazaqstandyq eksporttyń 60%-y munaıǵa tıesili ekenin eskersek, aǵymdaǵy shottyń traektorıasy qara altynnyń álemdik baǵasynyń traektorıasymen belgilenedi. Energıa jetkizýshleriniń baǵasy tómen bolǵan kezde tólem balansynyń aǵymdaǵy shoty tapshylyq aımaǵynda qaldy, al baǵa kóterilgen ýaqytta profısıt baıqaldy.
Mundaı zańdylyq osy jyldyń birinshi jartyjyldyǵynda da baıqalyp otyr: munaıdyń joǵary baǵasy aǵymdaǵy shottyń 6,6 mlrd AQSH dollaryna profısıtin qamtamasyz etti. Alaıda, bul turaqty úrdis emes, óıtkeni ol tek shıkizat baǵasynyń ósýimen ǵana qamtamasyz etiledi.
«Ekonomıkany ártaraptandyrý – bir kúndik jumys emes. Ol únemi júrgizilip otyrady. Úkimet 2025 jylǵa qaraı 41 mlrd AQSH dollary kólemindegi taýarlar men qyzmetterdiń shıkizattyq emes eksportyna qol jetkizýdi kózdeıdi. Osy maqsattyń ózi qazirden bastap bul baǵyttaǵy jumystardy kúsheıtýdi talap etedi. Qazaqstan ekonomıkasy syrtqy kúızelisterge ushyryp otyr. 2020 jyly munaı naryǵyndaǵy baǵa kereǵarlyǵymen, odan keıin ile-shala oryn alǵan jahandyq koronavırýs pandemıasymen baılanysty syrtqy táýekelderdiń is júzinde boı kórsetýi ınflásıanyń nysanaly dáliz sheginen shyǵyp ketýine jol berdi», - deıdi Ǵalymjan Pirmatov.
2021 jyldyń orta sheninen bastap álemde, sol sıaqty Qazaqstanda da jetkizý tizbeginiń buzylýynan taýar-shıkizat naryǵynda suranystyń jedel qalpyna kelýi men týyndaǵan jahandyq teńgerimsizdiktiń saldarynan ınflásıa qarqyn ala bastady. Bıyl ınflásıa geosaıası ahýaldyń shıelenisken tusta jańa aınalymǵa endi.
Degenmen, Ulttyq Banktiń jedel qabyldaǵan sharalary makroekonomıkalyq turaqtylyq pen teńge aktıvterin saqtap qalýǵa múmkindik berdi. Osy jyldyń aqpan-naýryz aılarynda qabyldanǵan sheshimder ulttyq valútany qoldaýǵa jáne qazaqstandyqtardyń jınaq qoryn qorǵaýǵa sebepshi boldy.