Abaı oblysynda órtengen aǵashty óńdeıtin zaýyt salynady.
Bul týraly Ekologıa jáne tabıǵı resýrstar mınıstri Erlan Nysanbaev aıtty, dep habarlaıdy Almaty-akshamy.kz
Vedomstvo basshysy óńirde bolǵan orman órtiniń saldaryn joıý boıynsha qandaı jumystar atqarylǵanyna toqtaldy.
Birinshiden, 2023 jylǵy qazanda mınıstrlik jedel shtab qurdy. Onyń quramyna Orman sharýashylyǵy jáne janýarlar dúnıesi aýmaqtyq ınspeksıanyń ókilderi, «Semeı ormany» rezervatynyń mamandary, Abaı oblysynyń ákimdigi men quqyq qorǵaý organdarynyń ókilderi kirdi.
Ekinshiden, tıisti jol kartasy bekitildi. Órt shalǵan ekpelerge qatysty orman mamandary júrgizgen zertteýlerdiń nátıjesi boıynsha aǵash zıankesteri men aýrýlary baıqalǵan. Osyǵan baılanysty orman zıankesteriniń taralýyna jol bermeý jáne aǵashty saqtaý úshin búlingen súrekti jınap alýdy barynsha qysqa merzimde iske asyrý qajet, - dedi Erlan Nysanbaev Májilistegi Úkimet saǵatynda.
Aldyn ala derekter boıynsha, Abaı oblysynda ormandaǵy órtten shamamen 6 mln tekshe metr aǵash janyp ketken. Rezervatta bar tehnıka men jabdyqtar, adam kúshi osyndaı kólemdegi jumysty isteýge eseptelmegen. Sondyqtan arnaıy tehnıka men jabdyqtardy satyp alý kerek.
«Órtengen orman aǵashtarynyń jalpy kóleminiń shamamen 80 paıyzy – otyndyq aǵash. Sondyqtan bul aımaqta aǵashty tereńdetip óńdeý zaýytyn salý kerek. Bul rette, mınıstrlik Abaı oblysynyń ákimdigimen birlesip, orman órtinen búlingen súrekti tereńdetip óńdeý zaýytyn salý úshin ınvestorlardy tartý máselesin pysyqtap jatyr. Qazir 4 kompanıa osyǵan múddeli», - dedi mınıstr.