Sońǵy nusqa resmı bekitildi
Sońǵy nusqa jurttyń talqylaýynan ótip, zańnamada belgilingen tártippen resmı bekitilip otyr, dep habarlaıdy Almaty-akshamy.kz Almaty.tv-ge silteme jasap.
Saıabaqta salynatyn nysandar búgin belsendi azamattarǵa da egjeı-tegjeıli túsindirildi. Oqýshylar saraıynyń alańynda atqarylar jumystyń úlgisi tanystyrylyp, jınalǵandar naqty málimet aldy. Máselen, jańa jobaǵa sáıkes, atalǵan aýmaqta 192 kóshe shamy men 21 jaryqshamdy aýystyrý josparlansa, odan bólek 5442 kóshet otyrǵyzý da kózdelgen. Atqarylar jumystyń qatarynda 71 oryndyq pen 64 qoqys jáshigin ornatý da bar.
«Búgin bárimizdiń jınalýymyzǵa bir ǵana sebep bar. Ol – saıabaqtyń tarıhı kelbetin saqtaýdy talap etý. Árıne, búgin biz tanysqan jumystyń jobasy burynǵysynan bólek ekenin kórdik. Eger turǵyndarǵa qolaıly jaǵdaı jasalsa, nege qoldamasqa», – dedi belsendi Tımýr Eleýsizov.
3 jyl buryn kópshiliktiń nazaryna usynylǵan jobaǵa bul joly birshama ózgertý engizilgen. Sońǵy nusqa jurttyń talqylaýynan ótip, zańnamada belgilingen tártippen resmı bekitilip otyr. Al kópti tolǵantqan granıt jıektastary eskertkishterdiń mańy men ortalyq aleıaǵa qaıta ornatylady.
«Qoǵamdyq keńestiń sheshimimen arnaıy monıtorıńtik top jumys isteıdi. Sol arqyly apta saıyn mundaǵy atqarylyp jatqan istiń jaı-kúıimen tanysyp otyramyz. Árıne, jumysty qadaǵalaıtyn negizgi mamandar bar. Sondaı-aq qala turǵyndarynyń da habardar bolyp otyrýyna jaǵdaı jasalǵan», – dedi qoǵamdyq keńestiń tóraıymy Altynaı Kóbeeva.