Meniń mektepte oqıtyn kezim, bir joly ákem ekeýmiz sırkke bılet alý úshin kezekke turǵanbyz. Biz ben kasanyń ortasynda tek bir ǵana otbasy tur. Sol otbasy maǵan kádimgideı erekshe áser qaldyrdy.
Bizdiń aldymyzda 12 jastan kishi bolý kerek dep topshyladym, segiz bala tur. Olardyń ústine qarap-aq bulardyń aqshasy kóp emes dep oılaýǵa bolatyn edi, biraq kıgen kıimderi muntazdaı tap-taza. Ózderi sondaı tárbıeli, áke-shesheleriniń artynan qaz-qatar ekiden tizilip, bir-biriniń qolynan ustap alǵan. Olar kloýndar, janýarlar jáne sol túni kórýge bolatyn barlyq nárseler týraly jarysa sóılep turdy. Balalardyń tolqyp turǵandaryna qarap-aq olardyń buryn sırkte bolmaǵanyn túsindim. Sol úshin de bul olardyń ómirine erekshe boıaý engizetindeı edi. Ákesi men anasy balalarynyń aldynda eńselerin tik ustap, maqtanyshpen tur.
Anasy kúıeýin qolynan ustap, oǵan qarap: «Sen meniń saýyty jarqyraǵan batyrymsyń» deıtindeı. Kúıeýi jymıa qarap, otbasyndaǵy baqytqa rahattanyp turdy. Bir kezde bılet satýshy er adamnan qansha bılet alǵysy keletinin surady. Ol maqtanyshpen: «men balalarǵa segiz bılet jáne eresekterge eki bılet satyp alaıyn dep edim», – dep jaýap berdi.
Bılet satýshy baǵany aıtqany sol edi, áıeli kúıeýiniń qolyn jibere salyp, eńsesi tússe, kúıeýiniń erinderi dirildep ketti. Ol basyn sál ıip, kasaǵa qaraı jaqyndap baryp: «baǵasy qansha dedińiz?» dep qaıtalap surady. Satýshy bılettiń baǵasyn qaıtalap aıtty. Otaǵasynyń aqshasy jetpedi. Sol sátte ol artynda turǵan segiz balasyna burylyp, sırkke kirý úshin aqshalary jetpeıtinin aıtý kerek bolǵan.
Bar jaǵdaıdy kórip turǵan ákem qolyn qaltasyna salyp jiberip, 20 dollarlyq kýpúrany shyǵaryp, jerge tastaı saldy (Sózdiń týra maǵynasynda biz eshqandaı baı emes edik!). Meniń ákem ıilip, 20 dollarlyq kýpúrany alyp, aldyndaǵy er adamdy arqasynan qaǵyp: «Keshirińiz, ser, myna aqsha sizdiń qaltańyzdan túsip qaldy» dedi. Er adam jaǵdaıdyń mánisin birden túsindi. Ol qaıyr suramaǵan edi, biraq úmitsiz, júrekti aýyrtatyn jáne yńǵaısyz jaǵdaıdaǵy kómekti baǵalady. Ol meniń ákemniń kózine týra qarap, eki qolymen qolynan ustap, 20 dollarlyq kýpúrany myqtap qysyp, erinderi dirildep, janarynan jas aǵyp: «Rahmet, rahmet, ser. Bul men úshin jáne meniń otbasym úshin óte mańyzdy edi» dep jaýap berdi.
Biz ákem ekeýmiz mashınaǵa oralyp, úıge qaıttyq. Ákemniń olarǵa bergen 20 dollaryna biz ózimizge bılet satyp almaqshy bolǵanbyz. Sol túni biz sırkti tamashalaı almasaq ta, ekeýmiz de ishteı sırk bere alatyn qýanyshtan da asyp túsetin baqytty sezingen edik.
Sol kúni men «Berýdiń» mańyzyn bildim. Alýdan góri kóbirek berýdiń qadirin uqtym. Eger siz ómirden góri úlken, keń bolǵyńyz kelse, berýdi úırenińiz. Mahabbattyń siz kútken nársege eshqandaı qatysy joq – tek siz bersem dep kútken nársege ǵana baılanysty – jáne bary sol.Berý men ózgelerdiń batasyn alýdyń mańyzdylyǵyn asyra baǵalaý múmkin emes, óıtkeni, berý kezinde únemi qýanysh qatar júredi. Berý arqyly bireýdi baqytty etýdi úırenińiz.
Orys tilinen aýdarǵan Ásel DAǴJAN