Elordalyq juqpaly aýrýlar ortalyǵynyń medısına qyzmetkerleri naýqastardy emdeý barysynda túsirilgen vıdeolardy jarıalady.
Kadrlarda túrli apparattardyń astynda jatqan balalardy baıqaýǵa bolady, dep habarlaıdy Almaty-akshamy.kz elorda ákimdiginiń resmı saıtyna silteme jasap
Sol sıaqty dárigerlerdiń arnaıy qorǵanys kostúmderin kıip, náresteni qalaı tamaqtandyryp jatqanyn kórýge bolady. Náreste reanımasıada jatqandyqtan («qyzyl aımaqta»), oǵan tek aýrýhana dárigerleriniń kirýine ǵana ruqsat beriledi.
Nur-Sultanda sońǵy aılarda stasıonarda em qabyldap jatqan naýqastar sany 30 eseden astam ósti. Sonymen qatar, vırýs balalar arasynda da tez taralady. Osy sebepti reanımasıaǵa túsetinder kórsetkishi artty. Dárigerler kezekti ret vırýstyń qaýipti ekeni taǵy de eskertti.
«Qazir bizdiń aýrýhanada jańa týǵan náresteden 18 jasqa deıin 200-den astam naýqas jatyr. Sondyqtan Nur-Sultan qalasynyń turǵyndaryna adam kóp jınalatyn oryndarǵa barmaýǵa, jeke gıgıenany qatań saqtaýǵa shaqyramyn. Aýrý belgileri bilingen jaǵdaıda dárigerdiń kómegine júginý kerek. Medısınalyq kómek alǵannan keıin, qajet bolǵan jaǵdaıda úıde emdelý kerek. Ózińizdi qorǵańyz. Qazir oqýshylardy Pfizer preparatymen vaksınalaý bastalǵanyn aıtqym keledi. Sondyqtan aýrýdyń aldyn alýdyń bir ǵana ádisi bar, ol vaksınasıa. Ekpe almaǵandardy vaksınadan ótýge shaqyramyn. Revaksınasıadan ótý mańyzdy», - deıdi №3 kópbeıindi qalalyq balalar aýrýhanasynyń dárigeri, bólim meńgerýshisi Janar Sambetqyzy.
Sondaı-aq, kadrdan úlken kisilerdiń de emdelip jatqanyn baıqaýǵa bolady. Aýrýdyń aýyr aǵymy bar naýqastar tynys alý júıesiniń qosalqy apparattaryna qosylady. Dárigerler indettiń kúsheıý sebebin jańajyldyq merekelermen jáne «omıkron» shtamynyń paıda bolýymen baılanystyryp otyr.
«Jańa jyldan keıin búkil el boıynsha koronavırýs ınfeksıasyn juqtyrǵandar sany kúrt ósti. Kún saıyn myńdaǵan adam jedel medısınalyq kómekke júginedi, júzdegen adam táýligine aýrýhanaǵa jatqyzylady. Bizdiń vaksınasıa ǵana pandemıadan qutqara alady!» - dedi joǵary sanatty dáriger-ırnfeksıonıst Sáýle Atyǵaeva.
Qalada ashylǵan 2 200 tósektiń 876-sy ǵana bos. Jasandy tynys alý apparatyna 17 pasıent qosylǵan.
Sondaı-aq, KVI-men ambýlatorıalyq deńgeıde emdeletin turǵyndar bar, olardyń sany qala boıynsha 33 myńnan asady.