Bıylǵy Qurban aıt merekesi elimizde 20-22 shilde aralyǵynda atalyp ótedi.
Qazaqstan Prezıdenti Qasym-Jomart Toqaev Qurban aıt merekesimen quttyqtady, dep habarlaıdy Almaty-akshamy.kz
«Ardaqty aǵaıyn! Sizderdi kúlli musylman qaýymy úshin qasterli Qurban aıt merekesimen shyn júrekten quttyqtaımyn! Bul – qaıyrymdylyq pen janashyrlyq, izgilik pen ımandylyq sıaqty asyl qasıetterdi dáripteıtin ulyq meıram. Salt-dástúrimizben berik ushtasqan ata dinimiz – eldiń rýhanı tutastyǵyn saqtaýǵa yqpal etetin basty qundylyqtyń biri. Qurban aıt qashanda barsha jurtty bereke-birlikke úndeıdi. El azamattaryn baýyrmal bolýǵa shaqyryp, búkil halqymyzdyń yrys-yntymaǵyn arttyrady. Musylman balasy bul kúnderi otbasy amandyǵy men el tynyshtyǵy úshin qurbandyq shalyp, joq-jitikke kómektesedi, muqtaj jandarǵa qamqorlyq tanytady. Osyndaı izgi nıet pen saýapty is el-jurttyń bir-birimen etene aralasýyna, ózara syılastyq pen jaqsylyqqa jol ashady. Qurban aıttyń ulaǵaty men ónegesi bizdiń rýhanı qundylyqtarymyzben úndesedi. Búgingi merekeniń mán-mańyzy osynda dep bilemin. Shalǵan qurbandyqtaryńyz, duǵa-tilekterińiz qabyl bolsyn! Aıttan aıtqa aman-esen jete bereıik!» - delingen Memleket basshysynyń quttyqtaýynda.