Resmı sapar.
Qazaqstan Prezıdenti Qasym-Jomart Toqaev Prezıdent Mýn Chje Inniń shaqyrýymen Koreıa Respýblıkasynyń astanasy Seýl qalasyna memlekettik saparmen bardy, dep habarlaıdy Almaty-akshamy.kz.
Bul jóninde Prezıdenttiń baspasóz hatshysy Berik Ýálı habarlady.
Prezıdentimiz Qasym-Jomart Toqaev – pandemıa bastalǵaly beri Ońtústik Koreıaǵa saparmen kelgen álemdik deńgeıdegi birinshi kóshbasshy. Memlekettik sapar baǵdarlamasy asa aýqymdy. Erteń, 17 tamyz kúni, Prezıdent Mýn Chje Inmen kelissóz ótkizý josparlanǵan. Onda taraptar Qazaqstan men Koreıa arasyndaǵy strategıalyq yntymaqtastyqty odan ári damytýdyń keń aýqymdy máselelerin qarastyrady. Kelissóz qorytyndysy boıynsha birqatar ekijaqty qujattarǵa qol qoıylady. Qasym-Jomart Toqaev Mýn Chje Inmen birge Koreıa bıznesiniń jetekshilerimen kezdesý ótkizedi.
Sonymen qatar, Memleket basshysy Koreıanyń ulttyq batyry, ómiriniń sońǵy jyldarynda Qazaqstanda turǵan general Hon Bom Dony eske alýǵa arnalǵan is-sharaǵa qatysyp, Otan úshin qurban bolǵandardyń monýmentine gúl shoǵyn qoıady.
Budan keıin Koreıanyń iri kompanıalarynyń qatysýymen birqatar ekijaqty kezdesýler ótkizedi. Sondaı-aq BUU-nyń burynǵy Bas hatshysy Pan Gı Mýnmen júzdesý josparlanǵan, dep jazdy ol feısbýk paraqshasyda.