Bul týraly Oqý-aǵartý mınıstri Asqat Aımaǵambetov óziniń Telegram arnasynda habarlady.
Mektepte oqýshylardy tamaqtandyrýdy uıymdastyrý erejesine ózgerister engizildi, dep habarlaıdy Almaty-akshamy.kz
Ol buǵan deıin mektep asqanalaryndaǵy tamaq ónimderiniń qymbattap jatqany týraly jazǵan edi. Mınıstr býfet ónimderiniń baǵasy kórshi dúkenge qaraǵanda eki ese qymbattap ketkenin, osyǵan baılanysty tıisti mamandardyń qatysýymen jumys toby qurylyp, qajetti túzetýler ázirlengenin aıtqan bolatyn. Endi Asqat Aımaǵambetov osy máseleniń tolyǵymen sheshilgenin habarlady.
«Qandaı ózgeris engizildi? Endi qyzmetterdi jetkizýshilermen azyq-túlikpen qamtamasyz etý týraly jańa sharttar jasalǵannan keıin mektep asqanalaryndaǵy baǵalar, onyń ishinde býfet ónimderi, sýsyndar men basqa da qyzmet kórsetýshilerdiń qalaýy boıynsha emes, ortasha naryqtyq baǵalardy eskere otyryp qalyptastyrylady. Sondaı-aq memlekettik satyp alý portalyndaǵy derekter bazasy men statısıka organdarynyń aqparaty negizge alynady. Bul asqanalarda baǵanyń kóterilýine jol bermeıdi. Endi jetkizýshiler tenderdi uıymdastyrýshynyń konkýrs qujattamasynda kórsetken as máziri men baǵalarǵa sáıkes qatań jumys isteıdi. Bul tyıym salynǵan ónimderdi óndirý jáne ótkizý táýekelderin joıý, sonymen birge býfet ónimderiniń baǵasyn belgileý úshin qajet. Sonymen birge ata-analardy tamaqtaný týraly habardar etý nemese onyń sapasyn baǵalaı alýy úshin bilim resýrsyna kezeń-kezeńimen norma engiziledi. Ol - paıdalanýshylarǵa qyzmet kórsetý jáne qolma-qol aqshasyz tólemder sapasyn baǵalaýǵa múmkindik beretin taǵamdardyń, as máziriniń, baǵalardyń fotosýretterin jarıalaý normasy. Budan basqa balabaqshalarda, balalar úılerinde balalardy úzdiksiz tamaqpen qamtamasyz etý úshin jergilikti atqarýshy organdardyń ınflásıa deńgeıin eskere otyryp, azyq-túlik baǵasynyń ózgerýi bóliginde satyp alý týraly sharttarǵa ózgerister engizý múmkindigi kózdelgen», – dedi ol.
Onyń aıtýynsha, bul myna nársege qatysty qajet bolǵan. Iaǵnı, azyq-túlik baǵasynyń ósýine baılanysty qańtar aıynda memlekettik satyp alý qorytyndysy boıynsha, mysaly, kartop 100 teńge turatyn kelisimshart jasalǵan jaǵdaılar jıi kezdesedi. Keıin birneshe aı ótken soń jetkizýshi taýardy jetkizýden bas tartyp, nátıjesinde uıym azyq-túliksiz qalady. Sot prosedýrasyna engizilgen josyqsyz jetkizýshilerdiń tizimi bar ekeni túsinikti, biraq kóptegen jetkizýshi muny elemeıdi, sóıtip jańa uıym ashylyp, jumysyn jalǵastyra beredi. Biraq bul ýaqytta balabaqsha búldirshinderdi tamaqpen qamtamasyz ete almaı otyrady. Endi jańa norma boıynsha ákimdikter mundaı jaǵdaılarda osy ónimderdiń ortasha baǵasyna sáıkes uıymdardy úzdiksiz qamtamasyz etý úshin qosymsha kelisim jasaıdy.
Bul erejeler kelesi jyldan bastap qyzmet kórsetýshilermen jańa kelisimsharttar jasalǵannan keıin qoldanysqa engiziledi.
Osy oraıda mınıstr Almatyda mektepte tamaqtandyrýdy uıymdastyrý boıynsha serpindi jobanyń bastalǵanyn, qazir tamaqtanýdy uıymdastyrý prosesin ońtaılandyrýǵa jáne jedeldetýge baǵyttalǵan pılottyq jobanyń qalanyń úsh mektebinde iske qosylǵanyn, mektepte as mázirin qalyptastyrý tásilderin jańartý jumystarynyń da bastalyp ketkenin aıtty.