Mınıstr Asqat Aımaǵambetov bul máseleni sheshý týraly aıtty.
Mınıstrdiń aıtýynsha, mektep asqanalaryndaǵy as mázirin qaıta qaraý kerek, dep habarlaıdy Almaty-akshamy.kz
Bul týraly QR Oqý-aǵartý mınıstri Asqat Aımaǵambetov aıtty. Mınıstrliktiń apparat jınalysynda Asqat Aımaǵambetov mektepterde balalardy ystyq tamaqpen qamtamasyz etý máselesine toqtaldy.
«Qazir ystyq tamaqpen qamtamasyz etý kórsetkishi ósip otyr deımiz. Biraq odan bólek qazirdiń ózinde ystyq tamaqpen qamtamasyz etip otyrǵan asqanalardyń jumysyn jetildirýde júıeli jumys bolýy kerek. Ol boıynsha komıtet tıisti zańnamalyq ózgerister daıyndady. As mázirin Densaýlyq saqtaý mınıstrligimen birge jańadan qaraýymyz kerek», - dedi ol.
Mınıstr mektep býfetterinde baǵaǵa qatysty da probemanyń bar ekendigin basa aıtty.
«Ár bilim bólimi, ár bilim basqarmasy buǵan kóńil bólýi kerek. Elorda mektepteriniń ózinde baǵanyń ósýi bar. 0,5 lıtr sýdyń baǵasy 350 teńge degen masqara. Basqa oblystar da mektep asqanalaryndaǵy baǵany qarańyzdar. Osy máseleni júıeli sheshý úshin tıisti zańnamalyq ózgerister engizemiz. Jańa oqý jylyna deıin bul problema sheshilýi kerek», - dedi Asqat Aımaǵambetov.
Sonymen qatar ol balalardy qaýipsiz tapsymaldaý úshin bıyl 515 avtobýs satyp alynatyndyǵyn atap ótti.
«Ol jumysty tamyz aıyna deıin bitirýimiz kerek. Keıbir óńirler bul jumysty áli bastaǵan da joq. Biz respýblıkalyq deńgeıde bul máseleni sizderge sheshtik, tıisti quraldardy berdik. Másele jalpy sheshilip otyr. Endi sony aıaǵyna deıin jetkizip, jumysty jańa oqý jylynyń basyna deıin bitirý qajet», - dedi mınıstr.