Búginde 3 mln adam MÁMS júıesinde tirkelmegen
Qazaqstanda MÁMS-ke tirkelmegenderdi júıege tartýdyń balamaly tetigin engizý josparlanyp otyr. Bul týraly QR Densaýlyq saqtaý mınıstri Ajar Ǵınıat elordada ótken mindetti áleýmettik medısınalyq saqtandyrý máselelerine arnalǵan dóńgelek ústel barysynda málimdedi, dep habarlaıdy Almaty-akshamy.kz QazAqparatqa silteme jasap.
«MÁMS (mindetti áleýmettik medısınalyq saqtandyrý) júıesinde túzetýdi talap etetin tustary da joq emes. Sonyń biri halyqty MÁMS júıesimen tolyq qamtý máselesi. Búginde 3 mln adam MÁMS júıesinde tirkelmegen, ıaǵnı saqtandyrylmaǵan. Biz óńirlerdi aralap júrmiz. Eshqandaı júıede tirkelmegen, sáıkesinshe tıisti medısınalyq kómekti ala almaı júrgen adamdar bar. Bul áserese eldimeken turǵyndaryna qatysty. MÁMS júıesin jetildire túsýde óńirlerdegi ınfraqurylym men medısınalyq mekemelerdiń tıisti qural-jabdyqpen qamtamasyz etilýi de mańyzdy», - dedi Ajar Ǵınıat.
Sondaı-aq, mınıstr MÁMS júıesiniń alǵa basýynda kadr máselesiniń de baryn aıtty.
«Medısına salasynda sıfrlandyrýdy qarqyndy túrde engizý kerektigin esten shyǵarmaǵan jón. Depýtattyq korpýstyń qoldaýymen jaqyn arada saqtandyrylmaǵan halyqty MÁMS júıesine tartýdyń balamaly tetigin engizý josparlanyp otyr. Oǵan sáıkes júıede tirkelmegen adamǵa aldyn ala 12 aılyq jarna tóleý qarastyrylyp otyr», - deıdi vedomstvo basshysy.
Buǵan deıin habarlaǵanymyzdaı elimizde joǵary tehnologıanyń kómegimen ota jasaý 3 ese artqan. Odan bólek, Qazaqstanda ólim-jitimniń 5 paıyz azaıǵany aıtyldy.