Almatynyń burynǵy ETJ-sy qalanyń úılesimdi damýyn qamtamasyz ete almady – sarapshylar
Almaty ákimdigi 2040 jylǵa deıingi Bas jospar aıasynda qalanyń odan ári damýyn retteıtin egjeı-tegjeıli josparlaýdyń jańa jobasyn qabyldady. Sáýletshiler men ýrbanıstıka salasyndaǵy mamandar ETJ-ǵa qatysty pikirin bildirdi.
Máselen, sáýletshi, Almaty qalalyq qurylys keńesiniń tóraǵasy Lúbov Nysanbaeva bes polıortalyqtyń ETJ bas jospardy iske asyrýdyń negizgi quramdas bóligi dep sanaıdy.
«Aldyńǵy bas jospar 2002 jyly jasaldy. Sol kezdegi egjeı-tegjeıli josparlaý jobasy qalanyń eki eseden astam úlkeıgen búkil aýmaǵyn úılesimdi paıdalanýdy qamtamasyz ete almady, óıtkeni olar bazalyq kórsetkishsiz jasaldy. Qalaǵa qosylǵan jańa aýmaqtar beıimdeý jáne damytý boıynsha keshendi jumysty talap etedi. Ózekti topografıalyq túsirilim júrgizýmen, bekitilgen eskızdik jobalardy, naqtylanǵan fýnksıonaldyq aımaqtarǵa bólý, halyqtyń tyǵyzdyǵy boıynsha, kúsh salýdy qajet etetin oryndar men qalanyń kólik-jaıaý júrginshiler júıesin retke keltirý jónindegi jobalyq usynystardy taldaýmen ázirlengen ETJ bas jospardy iske asyrýdyń birinshi kezektegi baǵdarlamasy bolyp tabylady», - dedi ol.
Sáýletshi polıortalyqtardy egjeı-tegjeıli josparlaý jobasynyń jıyntyq jospary Almatynyń damýyna qatysty júıeli túrde jumys isteýge múmkindik beretin jáne onyń barlyq qatysýshysy úshin ashyqtyq engizetin mańyzdy ári senimdi qural ekenin atap ótti.
Óz kezeginde ýrbanıst Svátoslav Mýrýnov polıortalyqtardyń egjeı-tegjeıli ornalasýynyń jańa jobasy oramdyq qurylys túrine baǵyttalǵanyn atap ótti.
«Iaǵnı, óziniń qorshaýy men turaǵy bar turǵyn úı keshenderinen arylyp jatyrmyz. Biz turǵyn úı, qoǵamdyq, komersıalyq nysandar oramdyq torǵa salynǵan qalalyq ortaǵa den qoıdyq. Bul halyqtyń óz aýdanynda birden birneshe jerge bara alýyna múmkindik beredi. Oramdyq tor meılinshe ózgermeli. Iaǵnı, úlken kúre jolǵa shyǵatyn bir ǵana joly bar turǵyn úı kesheninen aıyrmashylyǵy, tańdaýǵa bolatyndaı qalalyq keńistik túziledi», - dedi Svátoslav Mýrýnov.
Mýrýnov oramdyq qurylys balabaqsha, mektep, emhana sıaqty kóptegen nysandy salýǵa múmkindik beretinin jáne aýdanda jumys oryndaryn quratyn keńse men óndiristik úı-jaılardy qosýǵa múmkindik beretinin atap ótti.
Sáýletshi Baqtybaı Taıtalıev ETJ-da kórsetilgen tarıhı ortalyqta qurylys salý jónindegi shekteýlerdi kúsheıtýge basa nazar aýdardy.
«Eń bastysy, qalanyń tarıhı bóliginde qalyptasqan sáýlet keshenin, ıaǵnı tarıhı ǵımarattardyń qurylymy men stılin, kólemdi josparlaý sheshimderin, proporsıalary men bıiktigin buzatyn jańa qurylysqa tyıym salynady», - dedi sáýletshi.
Ol egjeı-tegjeıli josparlaý jobalaryn ázirleý kezinde zamanaýı qala qurylysy úrdisteri, jańa qurylys salý, ǵımarattardy qaıta jańartý qajettiligi men Almatynyń qalyptasqan sáýlettik kelbetin saqtaý arasyndaǵy tepe-teńdikke qol jetkizilgenin atap ótti.