Májilis depýtattary Qaınar Abasov, Berik Bekjanov, Syrym Ertaev jáne Ǵanı Tashqaraev Túrkistan oblysyndaǵy sý alǵan eldimekenderge bardy, dep habarlaıdy Almaty-akshamy.kz Májilistiń baspasóz qyzmetine silteme jasap.
Atap aıtqanda, Maqtaaral aýdanynda nóser jaýynnyń saldarynan aýdannyń 16 eldimekende sý deńgeıi kóterilgen. «Qazgıdromet» málimetinshe, 11-18 naýryz aralyǵynda jaýyn-shashynnyń mólsheri 87,7 mm boldy, al ortasha aılyq normasy 51 mm quraıdy. Osynyń saldarynan Syrdarıa ózeniniń, jer asty sý deńgeıi kóterilgen. Túrkistan oblysy Tótenshe jaǵdaılar departamenti basshysynyń aıtýynsha, Syrdarıa ózeniniń deńgeıi sońǵy aptada úsh eseden asqan. Shardara sý qoımasynda 5 mlrd. m3 sý jınalyp, Syrdarıa ózeniniń arnasymen Qyzylorda oblysynyń jáne «Kóksaraı» kontrregýlátoryna sý aǵyzylýda. Tótenshe jaǵdaılar men jergilikti atqarýshy organdar ókilderiniń birlesken áreketiniń nátıjesinde sý tasqynynyń saldaryn aldyn aldy.
Depýtattar sapar barysynda drenajdyq kolektordyń, sý tasqynynyń zardaptaryn joıý jumystarymen tanystyp, apat saldaryn joıý jónindegi aýdandyq shtabtyń jumysyna qatysyp, olardyń usynys-pikirlerin tyńdady.
Qaınar Abasovtyń aıtýynsha, óńirde kóterilgen negizgi máseleler – tik drenajdardyń tapshylyǵy jáne jer asty sýlaryn aǵyzýǵa arnalǵan kóldeneń drenajdardyń nashar jaǵdaıyna baılanysty jer asty sýlarynyń joǵary deńgeıi. Sondaı-aq «Qazvodhoz» fılıalynda tik drenajdardy kútip ustaýǵa jáne jóndeýge qarajattyń joqtyǵy. Mekemeniń elektr qýatynyń qarjysyn tóleýge múmkindikteri joq. Sý tasqynynan bolǵan zalaldy joıý jumystary jergilikti búdjet esebinen qarjylandyryp, komersıalyq kásipkerlik nysandaryn qalpyna keltirýge qarjy qarastyrylmaǵan.
Óz kezeginde, depýtattar atalǵan máselelerdi erekshe baqylaýǵa alyp, Parlamentte talqylaıtyndaryn aıtty.