Teatr garderobtan bastalatyny sıaqty, adamnyń mádenıetin de onyń tazalyqqa degen kózqarasy aıqyndaıdy, dep esepteıdi «Alataý» dástúrli óner teatrynyń ártisteri.
Búgin Alataý aýdanyndaǵy keshendi senbilik aıasynda Saın men Momyshuly kósheleriniń arasynda ornalasqan Móńke bı skveri tazartyldy. Teatr ujymy men aýdan ákimdigi ókilderi senbilikke jumyla kiristi.
Senbilikke qatysýshylar jumysqa kóterińki kóńil-kúımen yntalana kiristi.
– Búgingi senbilik aıasynda aǵashtardyń sanıtarlyq qyrqylýy da júrgizilýde. Biz bul sharaǵa «Alataý» teatrynyń qyzmetkerlerin arnaıy shaqyrdyq. Sonymen qatar, senbilikke qolǵap, boıaý, sypyrǵysh sıaqty qajetti quraldardy usynǵan merdiger uıymdar da atsalysýda. Mundaı ekologıalyq aksıalar aýdanymyz úshin óte mańyzdy, – dedi Alataý aýdany abattandyrý bóliminiń bas mamany Madıar Ábýev.
Teatr ártisteri sanaýly saǵat ishinde úlken jumys atqardy: oryndyqtardy boıady, aǵashtardy áktedi, qorshaýlardy jýyp, qysqy sýyqtan saqtaǵan japyraqtardy jınap, skverdi muqıat tazalady.
– «Almaty – bizdiń ortaq úıimiz» sıaqty keremet aksıanyń arqasynda biz qalamyzdy taza ustap, ony abattandyrýǵa óz úlesimizdi qosamyz. Qala turǵyndary senbilikterge qýana qatysady – aǵash otyrǵyzyp, kóshelerdi tazartady. Barsha almatylyqtardy osy aksıaǵa qosylyp, azamattyq boryshyn oryndaýǵa shaqyramyn, – dedi «Alataý» dástúrli óner teatrynyń ártisi Aıaýlym Qunanbaı.
Sonymen qatar, senbilik barysynda skver boıyndaǵy aǵashtar sanıtarlyq qyrqýdan ótti.
– Respýblıkalyq «Taza Qazaqstan» aksıasy bıyl ekinshi jyl qatarynan ótip jatyr. Bul bastama elimiz ben qalamyz úshin asa mańyzdy, sebebi ekologıalyq másele búginde álem boıynsha birinshi kezekte tur. Eger biz qorshaǵan ortaǵa uqyptylyqpen qaramasaq, onda súıikti qalamyz qalaı gúldenbek? Qalany taza ustaý – árbir azamattyń mindeti dep sanaımyn. Qalada tárbıege qatysty problemalar bar – mysaly, adamdar taýǵa barǵan soń qoqysyn jınamaı ketedi. Ókinishke qaraı, kólikten qoqys laqtyratyndar da, jol boıyna túkiretinder de bar. Bul – mádenıet deńgeıiniń tómendigin kórsetedi. Osyndaı is-sharalar arqyly biz tek turǵyndardy tárbıelep qoımaı, ózimizdi de tazalyqqa baýlımyz. Mádenıet osyndaı kishkentaı qadamdardan bastalady. Sondyqtan mundaı aksıalar óte mańyzdy jáne qajet, – dedi Qazaqstannyń eńbek sińirgen qaıratkeri, «Alataý» dástúrli óner teatrynyń damý jónindegi dırektor orynbasary Qaragóz Súleımenova.
Aıta keteıik, Almatyda kóktemgi «Almaty – bizdiń ortaq úıimiz» atty tazalyq naýqany respýblıkalyq «Taza Qazaqstan» aksıasy aıasynda bıylǵy sáýir aıyna deıin jalǵasady.