Óńirlik komýnıkasıalar qyzmetinde ótken baspasóz konferensıasynda osyndaı málimet aıtyldy. Qalalyq Tótenshe jaǵdaılar departamentiniń basshylyǵy týrıserdyń kóbeıýi oqys oqıǵanyń sanyna tikeleı áser etetinin atap ótip, qys mezgilinde qaýipsizdik erejesin saqtaý kerektigin eskertti.
Almaty aýmaǵynda taýly jerlerde izdestirý-qutqarý jumysyna eki bólimshe - QR TJM ROSO jáne qalalyq TJD Qutqarý qyzmeti tartylǵan. Olardyń jalpy sany 308 adam. Jumysqa 447 birlik tehnıka men tikushaqtar paıdalanylady. Týrıserdiń qaýipsizdigin arttyrý maqsatynda 2021 jyldyń qarasha aıynda taýdyń alys aımaqtarynda 18 qos tigildi. Kún raıy qolaısyz kezde sonda baryp panalap, azyq qoryn paıdalanýǵa bolady. Qosta dári qobdıshasy, mobıldi qurylǵylardy zarádtaıtyn stansıa, jyly kórpe men uzaq saqtalatyn azyq-túlik qory bar.
Qazir Almaty taýynda tórt baqylaý-qutqarý pýnkti jumys isteıdi: Úlken Almaty shatqalynda (KQP «BAÝ»), Kishi Almaty shatqalynda (KQP «Tuıyq-Sý»), «Medeý» aýdanynda (KQP «ROSO MEDEÝ») jáne Býtakov shatqalynda (KQP «Muztaý»). Olardyń ekeýi bıylǵy mamyr aıynda paıdalanýǵa berildi. Bul zardap shekken týrıserge kómek kórsetý ýaqytyn keı baǵyttarda 3–4 saǵatqa deıin edáýir qysqartýǵa múmkindik berdi. 2025 jyly QR TJM, Almaty qalalyq TJD qutqarý bólimsheleri men eriktiler 410 izdestirý-qutqarý operasıasyn júrgizdi. Sonyń arqasynda 617 adam qutqaryldy, olardyń ishinde kámeletke tolmaǵan 88 bala bar. 69 adam ártúrli jaraqat alǵan. Salystyryrsaq, byltyrǵy osy ýaqytta 360 operasıa júrgizilip, 396 adam qutqarylǵan, onyń 59-y balalar, 43 ret alǵashqy dárigerlik kómek kórsetilgen.
Qutqarýshylar qys mezgilindegi taýda qaýipsizdikti saqatýdy taǵy bir márte eske saldy. Eń aldymen durys kıiný kerek: qalyń jyly kıim, tabany taımaıtyn sý ótkizbeıtin aıaq kıim, qosalqy qolǵap pen bas kıim alyp júrý kerek. Mindetti túrde tolyq zarádtalǵan telefon, paýerbank, sham, navıgasıalyq qural, dári qobdıshasy, ot jaǵýǵa arnalǵan quraldar, sondaı-aq jetkilikti mólsherde sý men qýatty taǵam bolýy kerek. Baǵytty aldyn ala josparlaýǵa erekshe kóńil bólý qajet: taýǵa jalǵyz shyqpaı, qaýipsiz soqpaqtardy tańdap, jaqyndaryńyzǵa júretin baǵytyńyz ben qaıtar kezińizdi habarlap, aýa raıyn eskertip, qarańǵy túspeı turyp keri qaıtý kerek. Toppen júrgende birge bolyp, bólinbeýge tyrysyńyz. Sondaı-aq qutqarýshylar kóshkin qaýpi bar jaǵdaıda soqpaqtan shyqpaı, qalyń qar jaýǵannan keıin birden taýǵa barmaýǵa shaqyrdy. Kórinis nasharlaǵan kezde táýekelge barmaı, toqtap, jaǵdaıdyń jaqsarýyn kútken durys. Sýyq tıýdiń alǵashqy belgileri baıqalsa, qozǵalysty toqtatyp, jylynyp, tamaqtaný qajet. Taýda ishimdik ishýge qatań tyıym salynady. Mamandardyń aıtýynsha, osy erejelerdi saqtaý qaıǵyly jaǵdaılardyń aldyn alyp, qutqarý operasıalarynyń sanyn azaıtýǵa kómektesedi.