Jańa jyl – ǵajaıypqa senetín, otbasymen bír dastarqan basyna jınalyp, jyly estelíkterge toly fılmder kóretín erekshe kezeń. Būl kúnderí ekrannan kóbíne kúlkí syılaıtyn, úmít pen jaqsylyqty nasıhattaıtyn tuyndylardy kórgímíz keledí.
Tómende Jańa jyl men qysqy merekeler taqyrybyna arnalǵan, kórermenníń bírneshe buynyna ortaq keńes dáuíríndegí klassıkalyq fılmderdí ūsynamyz.
Eń tanymal klassıkalyq fılmder
«Ironıya sudby, ılı S legkım parom!» (1975) – Lenıngrad qalasyndaǵy kezdeısoq tanystyqtan bastalatyn, Jańa jylmen tyǵyz baılanysty eń tanymal fılmderdíń bírí. Dostarmen monshaǵa barudan bastalǵan oqıǵa kútpegen mahabbat hıkayasyna ūlasady. Būl tuyndy ondaǵan jyldar boıy jańa jyldyq merekeníń ajyramas bólígíne aınaldy. Keıín būl fılmníń jańa nūsqasy da túsíríldí, bíraq baıyrǵy kórermen úshín alǵashqysynyń orny erekshe.
«Karnavalnaya noch» (1956) – Eldar Ryazanov túsírgen muzykalyq komedıya. Lyudmıla Gurchenko oınaǵan, áıgílí «Bes mınut» ánímen este qalǵan tuyndy. Jastardyń jańa jyl keshín erkín árí kóńíldí ótkízgísí keluí men eskíshe oılaıtyn basshylyqtyń arasyndaǵy qaqtyǵys yumor arqyly kórsetíledí. Fılm optımızmge toly, jańa jyldyń ruhyn aıqyn sezdíredí.
«Charodeı» (1982) – Strugatskıılerdíń shyǵarmalary negízínde túsírílgen muzykalyq fantastıka. Jańa jyl túní bolatyn ǵajaıyptar, mahabbat pen sıqyr aralasqan muzykalyq fılm. Ǵylymı ınstıtuttaǵy tosyn oqıǵalar kórermendí ertegí álemíne jeteleıdí.
«Djentlmeny udachı» (1971) – oqıǵasy qysqy merekeler kezínde órbıtín qylmystyq-komedıyalyq fılm.
Qysqy atmosferasy bar komedıyalar
«Staryı Novyı god» (1980) – ártúrlí áleumettík toptan shyqqan kórshílerdíń ómírín ájuamen suretteıtín satıralyq komedıya.
«Zıgzag udachı» (1968) – mereke qarsańynda lotereyadan írí ūtysqa ıe bolǵan adam turaly oqıǵa.
«Ishchıte jenshchınu» (1982) – Rojdestvo qarsańyndaǵy Parıjde órbıtín komedıyalyq detektıv.
«Snegurochku vyzyvalı?» (1985) –kezdeısoq jūptasqan ártíster turaly jyly árí lırıkalyq hıkaya.
Jańa jyl taqyrybyndaǵy fılmder:
• jaqsylyqqa senudí úıretedí;
• otbasy men dostyqtyń mańyzyn kórsetedí;
• ótken jyldy oı elegínen ótkízíp, jańa úmítpen alǵa qarauǵa shabyttandyrady.