Qazaq kınosynyń jaýhary "Qyz Jibek" fılminde "Qyz Jibek" rólin somdaǵan aktrısa Merýert Ótekeshova Asanáli Áshimovti aqtyq saparǵa shyǵaryp salý rásiminde sóz sóıledi, - dep habarlaıdy Aqshamnews.kz tilshisi.
Aktrısa marqumdy teatr úshin "orny tolmas qaıǵy" dep atap, Asanáli Áshimov jurt júreginde máńgi qalatynyn aıtty.
"Bul - teatr úshin orny tolmas qaıǵy. Bizdiń súıikti Asanáli aǵamyz alys saparǵa attandy. Biraq ol júregimizde máńgi qalady. Halyq ony eshqashan umytpaıdy. Asanáli aǵanyń oınaǵan rólderi de, túsken fılmderi de, sińirgen eńbegi de ushan-teńiz", — dedi Merýert Ótekeshova.
Onyń aıtýynsha, Asanáli Áshimov óner jolynyń basynda júrgen shaǵynda ózine aǵa, ustaz ári dos retinde kóp demeý bolǵan.
"Maǵan Asanáli aǵa aǵa retinde de, akter, ustaz, dos retinde de kóp kómek kórsetti. Óner jolyn endi bastaǵan kezimde men óte jas edim. Tólegenim alys saparǵa ketti, endi Bekejanym - Asanáli aǵa da búgin alys jolǵa attandy. Endi olar joǵaryda bir-birimen qaýyshyp, bizge juldyzdaı qarap, qamqorlyǵyn kórsetetin shyǵar", — dedi aktrısa.
Sondaı-aq ol kelesi jyly teatrdyń 100 jyldyǵy toılanatynyn eske alyp, "bir jyl jetpeı qalǵanyna" ókinish bildirdi.
"Átteń, bir jyl jetpeı qaldy. Kelesi jyly teatrymyzdyń 100 jyldyǵy toılanady. Qalaı bolǵanda da, Asanáli aǵanyń ornyn eshkim basa almaıdy", - dep túıindedi Merýert Ótekeshova.
Eske salaıyq, qazaq kınosynyń korıfeıi, Qazaqstannyń halyq ártisi, Qazaqstannyń Eńbek Eri Asanáli Áshimov 21 jeltoqsanda 89-ǵa qaraǵan shaǵynda ómirden ozdy. Búgin, 23 jeltoqanda ony Almatyda kópshilik aqtyq saparǵa shyǵaryp saldy.