Almatynyń áleýmettik damýy qala úshin basym baǵyt bolyp qala beredi. Bul týraly Ortalyq komýnıkasıalar qyzmetiniń alańynda ótken brıfıń barysynda megapolıs ákimi Darhan Satybaldy málimdedi.
Qalanyń órkendeýi tek ekonomıkalyq kórsetkishtermen emes, eń aldymen halyqtyń ómir súrý sapasymen ólshenedi. Osy turǵydan alǵanda, áleýmettik damý – qala turǵyndarynyń ál-aýqatyn arttyrýdyń basty tetigi.
Bilim berý, densaýlyq saqtaý, mádenıet, áleýmettik qamsyzdandyrý sıaqty salalardyń damýy – árbir adamnyń kúndelikti ómirimen tikeleı baılanysty. Balalardyń sapaly bilim alýy, turǵyndardyń qoljetimdi medısınaǵa júginýi, kópbalaly otbasylar men qarttardyń áleýmettik qorǵalýy – bunyń bári qalada áleýmettik teńdik pen turaqtylyqty qalyptastyrady.
Áleýmettik ınfraqurylymdy jańartý, jańa mektepter men aýrýhanalar salý, balabaqsha oryndaryn kóbeıtý, qoǵamdyq kólikti jetildirý – turǵyndardyń ómir súrýine qolaıly jaǵdaı jasap, olarǵa jaıly orta qalyptastyrady. Bul tek turmystyq deńgeıde ǵana emes, azamattardyń bolashaqqa senimmen qaraýyna, qoǵamdaǵy belsendiligi men jaýapkershiliginiń artýyna da yqpal etedi. Sondyqtan áleýmettik damý – tek ákimshilik maqsat emes, ol – halyqtyń júregine jol tabatyn eń mańyzdy strategıalyq basymdyq.
Darhan Satybaldynyń aıtýynsha, Almatyda bilim berý jáne medısınalyq mekemeler jelisin keńeıtý boıynsha júıeli jumys jalǵasyp jatyr. Jaqyn ýaqytta 16 jańa balabaqshany paıdalanýǵa berý josparlanyp otyr. Sonymen qatar jekemenshik balabaqshalarda 10 000 qosymsha oryn ashýǵa memlekettik tapsyrys bar. Atalǵan sharalar 2030 jylǵa qaraı 2-6 jas aralyǵyndaǵy balalardy mektepke deıingi bilimmen qamtýdy 99 paıyzǵa jetkizýge múmkindik beredi. Sondaı-aq «Almaty mektep standartyna» sáıkes, oqýshy oryndarynyń tapshylyǵyn kezeń-kezeńimen azaıtý maqsatynda aldaǵy 5 jylda 16 mektep pen 7 qosymsha ǵımarat salý kózdelgen.
«Densaýlyq saqtaý salasynda biryńǵaı standartqa sáıkes qaladaǵy 475 myń turǵyndy medısınalyq qyzmetpen qamtıtyn medısınalyq-sanıtarlyq alǵashqy kómek kórsetetin 11 nysan salynady. Sonymen qatar 3 perzenthananyń, 2 zamanaýı stasıonardyń, sondaı-aq 250 orynǵa arnalǵan hospıs pen SPID ortalyǵynyń qurylysy bastalady. Medısınalyq ınfraqurylymdy jańǵyrtý maqsatynda 4 negizgi stasıonar men 2 klınıkalyq aýrýhanaǵa aýqymdy qaıta jańǵyrtý jumystary júrgiziledi. Budan bólek, 1,5 mln turǵyndy qamtıtyn 16 qosymsha jedel medısınalyq járdem stansıasy salynady», – dedi Darhan Satybaldy.
Qalanyń áleýmettik damýy – turǵyndardyń kúndelikti ómir sapasynyń basty kóretkishi. Áleýmettik salaǵa jumsalǵan árbir ınvestısıa – turǵyndardyń densaýlyǵy men bolashaǵyna baǵyttalǵan qadam. Bilim men medısınaǵa, mádenıet pen áleýmettik qoldaýǵa basymdyq berý ár azamattyń ózin qaýipsiz, baǵaly ári qajet sezinýine jol ashady. Sondyqtan da áleýmettik damý turaqty, órkenıetti qoǵamnyń negizi bolyp qala beredi.