Kelesi apta qol qoıylady dep kútilýde.
Eki eldiń kóshbasshylary AQSH-tyń deldaldyǵymen kelisimge keldi. Iaǵnı eki memleketke de Shyǵys Jerorta teńizindegi gaz ken oryndaryn ıgerýge múmkindik beriledi, dep habarlaıdy Almaty-akshamy.kz Inbusiness.kz silteme jasap.
Kelisimge kelesi apta qol qoıylady dep kútilýde. Eki el de kóptegen jyldar boıy nátıjesiz kelissózderden keıin kelisim jasasýǵa yntaly.
Eki el arasyndaǵy kelispeýshilik jalpy aýdany 860 sharshy shaqyrym bolatyn munaı men gazǵa baı teńiz aımaǵyna qatysty týyndaǵan. Oǵan Izraıldiń erekshe ekonomıkalyq aımaǵynyń 2% jáne Lıvannyń 3% kiredi. Taraptar kóptegen jyldar boıy daýly aımaqtaǵy shekaralardy belgileý týraly nátıjesiz kelissózder júrgizip keldi.
Lıvan men Izraıl arasyndaǵy soǵys tolyǵymen aıaqtalmaǵany ári resmı túrde dıplomatıalyq baılanystyń joqtyǵy jaǵdaıdy qıyndata tústi. Alaıda, taraptardyń aqyry ortaq til tabýyna kedergi bolmady. Tek 2020 jyldan bastap BUU qoldaýymen jáne Amerıka Qurama Shtattarynyń deldaldyǵymen júzege asyrylǵan daýly aýmaqtar máselesi boıynsha janama kelissózderdiń keminde bes sesıasy ótkizildi.
Sońǵy kelissózderde taǵy da Vashıngton medıator boldy. Bul joly AQSH Memlekettik energetıkalyq qaýipsizdik departamentiniń aǵa keńesshisi Amos Hohshteın kelissóz júrgizýshi bolyp taǵaıyndaldy. Kelisimniń jańa jobasy kópshilikke jarıa etilmegenimen, lıvandyqtar men ızraıldikter ony oń baǵalady. Izraıldiń Haaretz gazetiniń habarlaýynsha, joba Beırýttyń tilekterin saı, Lıvanǵa daýly teńiz aımaǵynyń kóp bóligin berýdi kózdeıdi. Biraq Izraıl óziniń Karıshtegi gaz munarasyn alady. Lıvan sonymen qatar birden eki jaqqa tıesili Kana aımaǵynda óziniń burǵylaý qondyrǵysyn ornata alady. Alaıda Izraılge fransýzdyq Total Energies kompanıasy Kannan óndiretin gazdan túsetin kiristiń bir bóligin berip otyrýy tıis.