Otbasylyq zorlyq-zombylyqtan zardap shegip júrgen almatylyq áıel ádildik izdep júr.
Almatylyq Araılym Jeksembekova kúıeýi alǵash ret osy kóktemde otbasylyq janjaldan keıin urǵanyn aıtady. Aıtýynsha, sodan keıin uryp-soǵý jıilep ketken. Kúıeýi júkti áıeldi páterge jaýyp, bes kún qatarynan zorlyq jasap, uryp-soǵyp, vanadaǵy sýǵa batyrǵan. Ol ózin soqqyǵa jyqqan kúıeýi jazadan qutylyp kete me dep qorqady, dep habarlaıdy Almaty-akshamy.kz.
«İshimnen teýip, sýǵa batyrdy, baılap ustady. Sol kúnder esimde, bilesiz be, sol bes kúnde tezirek óltirse eken dep tiledim. Ákimshilik sot qaýlysynda ol shynymen de esirtkilik zat áserinde bolǵany kórsetilgen», - dedi zorlyq-zombylyq qurbany.
Áıel polısıaǵa aryz jazǵan, alaıda, onyń aıtýynsha, bul uzaq ýaqyt boıy qaralmaǵan. Birneshe aıdan keıin ǵana qylmystyq is qozǵalǵan. Alaıda kúıeýi bostandyqta. Onyń aıtýynsha, kúıeýi jıi qorqytady.
Polısıa oqıǵanyń barlyq mán-jaıy anyqtalsa, er adam jazalanatynyn habarlady.
«Bostandyq aýdanynyń polısıa bólimi QR QK-niń 110-baby («Azaptaý») boıynsha qylmystyq is qozǵady. Qazirgi ýaqytta istiń mán-jaıyn anyqtaýǵa jáne kináli adamdy qylmystyq jaýapkershilikke tartýǵa baǵyttalǵan jedel-izdestirý sharalary kesheni júrgizilip jatyr», - dedi Polısıa departamentiniń ókili Saltanat Ázirbek.
Bul rette zańgerler sońǵy kezderi turmystyq zorlyq-zombylyq oqıǵalary jıilep ketkenin aıtady. Olar mundaı zańsyz áreketter úshin jazany qataıtyp, taraptardyń tatýlasýyna zańmen tyıym salýdy usynyp otyr.
Al er adam tek eki jylǵa deıin bas bostandyǵynan aıyrylýy múmkin. Tergeý qashan aıaqtalatyny ázirge belgisiz.