Qarjy mınıstrligi jeke tulǵalardyń kolektorlyq jáne mıkroqarjy uıymdary aldyndaǵy bereshegi jaıyndaǵy málimetterdi memlekettik kiris organdaryna usyný qaǵıdalaryn jarıalady, dep habarlaıdy aqshamnews.kz
Mınıstrdiń arnaıy buıryǵy ázirlendi. Oǵan sáıkes, kirister men múlik týraly deklarasıany tapsyrýǵa mindetti jeke tulǵalardyń qaryzdary týraly aqparat salyqshylarǵa jiberilip turady. Qaryzdarǵa qatysty málimetti jiberý tártibi:
memlekettik kirister komıteti esepti jyldan keıingi jyldyń 25 qarashasynan keshiktirilmeıtin merzimde esepti jyldyń 31 jeltoqsanyndaǵy jaǵdaı boıynsha aktıvteri men mindettemeleri, kiristeri men múlki týraly deklarasıany usyný boıynsha mindeti týyndaǵan jeke tulǵalardyń tizimin qalyptastyrady;
komıtet jeke tulǵalardyń tizimin qalyptastyrǵan sátten bastap kúntizbelik 10 (on) kún ishinde Komıtettiń "Smart Data Finance" aqparattyq júıesi arqyly kredıttik búroǵa jiberedi;
kredıttik búro jeke tulǵalardyń kolektorlyq uıymdar aldyndaǵy bereshegi boıynsha málimetterdi jiberedi;
"Komıtet pen kredıttik búro osy qaǵıdalar sheńberinde alynǵan aqparattyń qupıalylyǵyn qamtamasyz etedi", - delingen buıryqta.