«Taza Qazaqstan» ekologıalyq baǵdarlamasyn iske asyrý aıasynda Almaty qalasynyń mamandandyrylǵan tabıǵat qorǵaý prokýratýrasy, qala Ekologıa jáne qorshaǵan orta basqarmasy jáne «İle-Alataý» memlekettik ulttyq tabıǵı parki birlesip Aıýsaı shatqalynda senbilik uıymdastyrdy, dep habarlaıdy aqshamnews.kz
İs-sharanyń maqsaty – tabıǵı aýmaqtardy tazartý, ulttyq parktiń ekojúıesin saqtaý jáne turǵyndar arasynda ekologıalyq mádenıetti arttyrý.
Aksıaǵa qatysýshylar shatqal aýmaǵyn turmystyq qaldyqtan tazartyp, japyraqtylar, qylqanjapyraqtylar men jemis aǵashtarynyń 100 kóshetin otyrǵyzdy. Bul Almatynyń jasyl beldeýin keńeıtýge jáne tabıǵı ortaǵa oń áser etýge múmkindik beredi.
«ECO Network» ekologıalyq qozǵalysy qala ákimdiginiń «Eko-Hab» jobalyq keńsesimen birlesip ınteraktıvti ekoaımaq uıymdastyrdy. Qonaqtarǵa plasıkti qaıta óńdeıtin velosıped-shrederdiń jumysy kórsetildi, qaıta óńdelgen shıkizattan jasalǵan buıymdar usynyldy, sondaı-aq qaldyqtardy bólek jınaýǵa arnalǵan ekobokstar ornatyldy. Senbilik barysynda 1000-nan astam plasık bótelke men alúmını qutylary jınalyp, qaıta óńdeýge jiberildi.
Igi iske 500-den astam adam qatysty: memlekettik organdardyń ókilderi, ulttyq park qyzmetkerleri, Polısıa departamenti, joǵary oqý oryndary, ekologıalyq jáne qoǵamdyq uıymdar, bıznes-qoǵamdastyq, sondaı-aq qala turǵyndary bar.