Qala aglomerasıasynyń ósýi, halyq sanynyń kóbeıýi, kópqabatty úılerdiń salynýy órt qaýipsizdigi máselesin ózekti ete túsedi.
Osy oraıda elordalyq Memlekettik órt baqylaý basqarmasynyń bastyǵy Erkin Otarǵalymuly órt sóndirý kezindegi kedergiler men qıyndyqtar týraly aıtyp berdi, dep habarlaıdy Almaty-akshamy.kz.
Spıkerdiń aıtýynsha, jalpy órt sóndirý barysynda oqıǵa ornyna jetý, joldyń ashylmaýy, sý kózderiniń tapshylyǵy sekildi kedergiler týyndaıdy.
«Búgingi tańda qala aýmaǵynda órtterden qorǵaý úshin 12 órt sóndirý bólimi qyzmet atqarady. Normalarǵa sáıkes, órt sóndirý qyzmetiniń shaqyrý ornyna 10 mınýtqa deıin jetýi tıis, alaıda kóp jaǵdaıda atalǵan ýaqytqa ýaqytyly habardyń kelmeýi, órt ornyna bara jatqan tehnıkaǵa jol bermeý, ótkizbeý sekildi birneshe faktor áser etedi. Ýaqytyly kelgen órt tehnıkasy da kópqabatty úılerdiń aýlasyna kire almaı jatady», - dedi Erkin Otarǵalymuly Astana qalalyq komýnıkasıalar qyzmetinde.
Qoldanystaǵy órt qaýipsizdigi erejelerine sáıkes, órt tehnıkasyna arnalǵan joldar árqashan ashyq jáne jaramdy kúıde ustalýy kerek. Bul – órt qaýipsizdigin qamtamasyz etýdiń ajyramas bóligi, dep jazdy QazAqparat.
«Búgingi tańda kópqabatty úı aýlasyna kireberiste temirden, betonnan kedergi qoıý jıiledi. Munda turǵyndar balalar qaýipsizdigin alǵa tartyp, bóten kólik kirmeý keregin aıtady. Alaıda bul órt qaýipsizdigi talaptaryna qaıshy keledi. Shlagbaýmdardy qoıýǵa shekteý joq, alaıda atalǵan shlagbaýmdarda mindetti túrde kúzet bolýy kerek, táýligine 24 saǵat jedel qyzmet kólikteriniń ótýine jaǵdaı jasaýy shart. Bul erejeler – shaqyrýǵa kele jatqan órt sóndirýshiler nemese medısına qyzmetkerleriniń kómekke ýaqytyly jetýiniń birden-bir kepili», - dedi spıker.
Ásirese 10 qabattan joǵary turǵyn úılerdiń eki janynan bos jol qarastyrylýy kerek. Alaıda kólik qoıýǵa baılanysty, arnaıy mamandandyrylǵan órt tehnıkasy kire almaı jatady, kirgende de adamdardy qutqarý úshin tehnıka qanatyn jaıa almaıdy.
«Taǵy bir másele – turǵyndar qudyqtar men órt gıdranttarynyń ústine kólik qoıyp tastaıdy, qys mezgilinde muzdan, qardan tazalanbaı qalady. Olarǵa baratyn jolǵa arnaıy belgi de qoıylýy kerek. Munyń barlyǵy órt sóndirýge, adam ómirine arasha túsýge kelgen qutqarýshylardyń jumysyna kedergi keltiredi. Atalǵan máselelerdi sheshý úshin departament tekserýler júrgizedi, PIK, OSI basshylarymen, turǵyndarmen jıyn ótkizip, órt tehnıkasynyń ótýi probloemasyn kóteredi», - dedi E. Otarǵalymuly.
Onyń aıtýynsha, 2018 jylǵa deıin abattandyrý erejelerine sáıkes, kópqabatty úılerdiń aýlalarynda temir shlagbaýmdardy, beton bloktardy qoıýǵa tyıym salynǵan bolatyn. 2018 jyly atalǵan erejege ózgeris engizilip, tarmaq alynyp tastalǵan.